21.4.2024 | 04:00
Sumarmál
Að loknum vetri
ríf ég gat á myrkrið
til að sjá sumarið
birtast af fjöllum
Úti í garði
er svartur fugl
sem syngur
hugsanir mínar
Gengin spor
skrýðast nú skjótt
döggvuðum stráum
á grundum grænum
-Og ný útsprungin
titrandi laufblöð
hvísla að kalkvist
máttugum ljóðum
-með rómi
--svo ljúfum
---og blíðum
Það er í garðinum
þar sem morgunninn
nú kviknar og hlýnar
sem svartþrösturinn syngur
döguninni í austri vorsins lof
-Og það er þá
sem lúinn hugur
í eitt skiptið enn
gleðst við hans söng
um vor
Dægurmál | Breytt s.d. kl. 08:09 | Slóð | Facebook | Athugasemdir (5)