Lónsheiði

Það var ekki seinna vænna en að klára afmælisgjöfina hennar Matthildar minnar. En í fyrra gaf ég henni ferð yfir Lónsheiði í afmælisgjöf, fjallveg sem fara þurfti áður en vegurinn um Þvottár- og Hvalnesskriður kom til sögunnar. En þannig var að Matthildur minntist á það nokkrum dögum fyrir afmælið í fyrra að hana langaði til að fara Lónsheiði, veg sem var aflagður 1981.

Kvöldið fyrir afmælisdaginn staglaði ég mig í gegnum fésbókina og sá þá þar lesningu með tilheyrandi myndum frá vöskum vini, sem sagðist hafa farið með frúna sína yfir Lónsheiði þann daginn, og ekki verið nokkurt mál. Seinna komst ég reyndar að því að þetta hefði verið meira mál en nokkurt, félaginn vaski hefði staðið í grjótburði í heilan dag til að koma sér frúnni og Crusernum ofan af heiðinni.

Ég semsagt bauð Matthildi að morgni afmælisdagsins að aka henni yfir Lónsheiði í afmælisgjöf. En við heyktumst á Lónsheiði þegar við vorum komin nógu langt til að sjá eftir veginum upp á hæðstu brún Álftafjarðar megin, snérum við og fórum Þvottár- og Hvalnesskriður yfir í Lón og upp að Traðargili þeim megin í heiðinni og höfðum þá talið okkur trú um að hafa farið tvisvar fram og til baka Lónsheiði, án þess að fara yfir há heiðina.

Það ferðalag endaði svo óvænt í Eldgjá og höfðum við þá farið í Laka, Skaftártungu, Meðalland, Fjaðrargljúfur og margt fleira, áður en við skakklöppuðumst heim á leið þriðja í afmæli. Svo var það núna í fyrradag að ég sá að gamlir grannar státuðu af því á facebook að hafa farið akandi Lónsheiði eins og ekkert væri og kom fram hjá þeim í máli og myndum að þetta væri hægt vegna þess að ljósleiðari hefði verið lagður yfir heiðina nýlega.

Ég sagði Matthildi minni að nú yrði ekki hjá því komist að klára afmælisgjöfina frá í fyrra, því hún ætti afmæli aftur eftir nokkra daga. Eldsnemma í gærmorgunn lögðum við af stað. Hún hafði ítrekað á orði að þetta yrði sjálfsagt enn ein glæfraförin, við hefðum ekki verið svo beysin eftir glæfraferðina í fyrra. En ég tuðaði um að við værum samt búin að lifa á henni í heilt ár, safna aftur fyrir bensíni og láta gera við Cherokee.

Þetta er sjötta Cherokee sumarið okkar á átta gata tryllitæki frá því á síðustu öld sem drekkur bensín í magni, sem engin sómakær vill gefa upp og annt er um kolefnisporið. Öll sumrin á Cherokee höfum við fetað krákustíga fjallanna enda fótafúin með afbrygðum en Cerokee er jeppi eins og gamli góði Willys sem fetaði sporið skref fyrir skref í lágadrifinu eins og gamli Sorry Gráni hafði gert í gegnum aldirnar.

Það verður að segjast eins og er að þessi sumur hafa gefið okkur endurnýjun lífdaga og við höfum ferðast um furðu slóðir landsins eins og börn náttúrunnar. Prílað um fjöll æskuáranna, þar sem slóðarnir lágu í gegnum aldirnar, á lúnum bíl vel við hæfi frá því á síðustu öld. Enda eigum við bæði það sameiginlegt að eiga sérlega erfitt með að yfirgefa 20. öldina. Hvað ég gef Matthildi í afmælisgjöf eftir tvo daga er ég orðin forvitinn að vita.

 

Lagt á heiðina við Selá úr Starmýrardölum í Álftafirði

 

Víða hefur hlaupið úr veginum

 

Vissara þótti að labba þar sem skriðan hafði farið með veginn og slóðinn eftir ljósleiðaralögnina lá upp í skriðu

 

Séð yfir í Lón á há heiðinni

 

Á niður leið Lóns megin

 

Matthildi þótti vissara að skoða götin -og kanna burðarþolið á brúnni yfir Traðargil áður en Cherokee var hleypt út á hana

 

Traðargil 

 

Traðargil séð ofan frá skriðunni

 

Stoppað í kaffi og æði á fyrr um þjóðvegi eitt. Það kom engin til að flauta. Sennilegra er minni umferð og meiri ró á Lónsheiði, heldur en Hornströndum

 

Athugasemdir

[Ómar Geirsson, 19.7.2021 kl. 12:29]

Takk Magnús.

Yndislestur.

Kveðja úr sólarglætunni að neðan.

[Pétur Örn Björnsson (IP-tala skráð) 19.7.2021 kl. 15:43]

Þú lyftir manni alltaf eilítið upp til andans, með pistlum þínum.  Takk fyrir, Magnús.

[Halldór Egill Guðnason, 20.7.2021 kl. 14:26]

Þessa leið þarf maður að aka bið tækifæri. Mikið assgoti endist Sherókíinn vel hjá þér! Þakka fyrir hugljúfan og skemmtilegan pistil.

Góðar stundir, með kveðju að sunnan.

[Magnús Sigurðsson, 20.7.2021 kl. 20:05]

Takk fyrir félagar.

Ég var nú hálfefins um að láta þennan pistil flakka þar sem hann gæti virst sjálfhverfur hvað afmælisgjöfina varðar. En Cherokee stoppar ekki þessi dagana hjá okkur Matthildi minni,

Nú er nýlokið leiðangri í Loðmundarfjörð, þar sem Duster var einnig hafður með í för, um hraðbraut miðað við Lónsheiði, en seinfarið í góðra vina hóp og 24°C.

Víkurnar og Loðmundafjörður eru rétt eins og Hornstrandir, paradís göngufólks, en langt í frá eins friðsælt þar og í Starmýrardölum og á Lónsheiði. 

[Halldór Egill Guðnason, 21.7.2021 kl. 00:07]

 Myndin af ykkur Matthildi, við kaffiborð á miðri brúnni yfir Traðargil er ekkert annað en dásamleg. Afslappaðri slóði verður trauðla fundinn á Íslandi öllu. Já og til hamingju með Matthildi. Ekki slæm afmælisgjöf að fá að renna þetta í rólegheitunum á ódrepandi sjerókí.

 Góðar stundir, með kveðju að sunnan.

[Magnús Sigurðsson, 21.7.2021 kl. 05:47]

Takk fyrir Halldór.