Óritrýndur ritdómur

Nú hefur Why Iceland viðundrið Ásgeir Jónsson gefið út jólabók um Sögu-eyjuna hans Ingólfs. Svarti víkingurinn Bergsveinn Birgisson var ekki allskostar ánægður með efnistökin og taldi að þarna hefði banksterinn seilst í sinn sagnasjóð. Gettu betur gáfnaljósið Sverrir Jakobsson, -já einmitt bróðir þeirrar flissandi, -taldi það þá ekki vera sögulega merkilegan þjófnað vegna þess að sá svarti hefði ekki verið ritrýndur af viðurkenndri fávisku fabrikku ríkisins.

Why Iceland viðundrið gaf þá fljótlega í framhaldinu út yfirlýsingu á facebook um að hann hefði aldrei fyrr verið sakaður um þjófnað. Alveg búinn að steingleyma árunum hjá Kaupthing. Hvað þá að hann myndi þegar kaupþingið var komið út á Edge í Evrópu. Þar dugði það eitt að vera Íslendingur til að vera grýttur á götum úti fyrir þjófnað nokkra októberdaga 2008.

Þessi vonarstjarna banksterana á Íslandi, sem viðraði sína engilbjörtu ásjónu í fjölmiðlum allt fram á ögurstund 2008, taldi þar landanum trú um að allt væri í himnalagi á meðan flest var á leið helvítis hjá Jóni og Gunnu, spilaði betur en keisarinn sjálfur á meðan Róm brann, og hefur nú uppskorið verðskuldaða umbun hjá banana aðli þessa lands fyrir að hafa komið þeim í money haven.

Why Iceland höfundurinn ætti kannski frekar að glugga í fyrrum hagsöguritum Seðlabankans og gefa út fyrir jólin hvað varð af gjaldeyrisvarasjóði þjóðarinnar um árið. Þó sú jólabók yrði ekki um annað en hvar bananarnir séu nú niðurkomnir í lýðveldinu, -væri alls ekki ómögulegt að hann fengi þannig á sig ritrýndan dóm um hagsögufölsun og jafnvel fórnarlambs tilnefningu til aumingja vikunnar í viðurkenningaskini frá þjóðinni.

Nú hef ég hvorki lesið Why Iceland með spurningamerkinu, eða uppreisn Jóns biskup Arasonar, hvað þá Sögu-eyjuna hans Ingólfs, úr sagnabrunni seðlabankastjóra. Örlítinn úrdrátt gluggaði ég þó í um forföður minn Jón Arason, fannst eins og um copy paste afturgöngu Jóns heitins Helgasonar væri að ræða. Svo ég lét þá jólabók fram hjá mér fara enda forðast ég að kaupa þýfi fyrir jól.

Hvað leit Bergsveins Birgissonar af svarta víkingnum varðar, þá man ég ekki til að aðrir hafi fyrr haft uppi sömu efnistök á Íslandsögunni og Bergsveinn hafði um Svarta víkinginn. Þar voru settar fram tímamóta söguskýringar á prent. Svo einstakar, að meir að segja Fornleifur, hér á blogginu, hefur ekki orðið meira niðri fyrir síðan hann sakaði höfund Miðhúsasilfursins um að hafa haft Kristján Eldjárn fyrrverandi forseta lýðveldisins að fífli. -Já og, -Guð blessi Ísland.

Athugasemdir

[Sigurður Kristján Hjaltested, 11.12.2021 kl. 12:44]

Snilldar pistill.

Takk fyrir og amen.

[Grímur Kjartansson, 11.12.2021 kl. 13:56]

Var alveg búinn að gleyma að Ásgeir var í Kaupthing
En veit að það hafa verið ráðnir mjög margir starfsmenn til starfa hjá Seðlabankanum sem áður störfuðu hjá Kaupthing/Arionbanka eftir að Ásgeir tók við!
Til er ævintýri um Trölla sem stal jólunum
Ættum við almúginn að hafa áhyggjur af gullforðanum í hvelfingunni í kjallara Svörtu lofta - hver tékkar á að hann sé á sínum stað?

[Magnús Sigurðsson, 11.12.2021 kl. 14:25]

Þakka ykkur fyrir innlitin og athugasemdirnar Sigurður og Grímur.

Það fljótt að fenna í sporin, ekki veit ég hvort gullforði er í Seðlabankanum, held reyndar að hann sé löngu farin til London.

Í á milli Kaupþings og Seðlabankans var why Icland viðundrið við kennslu og rannsóknir í Háskóla Íslands til 2011, en þá tók hann við efnahagsráðgjöf GAMMA sem fékk eigna safn Íbúðalánasjóðs eftir hrun.

Ef mér skjöpplast ekki þá hefur ekki enn tekist að toga það upp úr stjórnsýslunna á hvaða kjörum það safn fékkst og koma því fyrir almenningssjónir.

Svo kannski væru hæg heimatökin að skrifa eina jólabók um þá hagsögu, hún gæti verið dramatísk þegar þúsundir landsmanna voru í þeim aðdraganda bornir út á Guð og gaddinn og hrint fyrir ætternisstapann svo gammar þyrftu ekki að lifa við fjártjón og fæðsluleysi.

https://www.google.is/search?q=gamma+eignasafn+%C3%ADb%C3%BA%C3%B0al%C3%A1nasj%C3%B3%C3%B0s&sxsrf=AOaemvJXEYflxFCeekuAP__Rka_nnVQrPg%3A1639231378593&source=hp&ei=kq-0YfmPIZGPjLsPxNO7kAo&iflsig=ALs-wAMAAAAAYbS9otg0aa_NwrLHjzza6_bRrIc2WKaN&ved=0ahUKEwj5oJfg9Nv0AhWRB2MBHcTpDqIQ4dUDCAc&uact=5&oq=gamma+eignasafn+%C3%ADb%C3%BA%C3%B0al%C3%A1nasj%C3%B3%C3%B0s&gs_lcp=Cgdnd3Mtd2l6EAM6BAgjECc6CggjEM0DECcQiwM6BwgjECcQiwM6EAguELEDEIMBEMcBENEDEEM6CggAELEDEEMQiwM6CwgAEIAEELEDEIsDOggIABCABBCxAzoLCC4QsQMQxwEQrwE6BQgAEIAEOgQIABBDOg4ILhCABBCxAxDHARCvAToLCAAQgAQQsQMQgwE6EQguEIAEELEDEIMBEMcBEK8BOgsILhCABBDHARCvAToICC4QgAQQsQM6BQguEIAEOgsILhDHARCvARDLAToFCAAQywE6BQguEMsBOgYIABAWEB46CAghEBYQHRAeOgUIIRCgAToHCCEQChCgAToECAAQDToGCAAQDRAKUABY4IwBYMSYAWgHcAB4AIAB2wGIAcsqkgEGMC4zNi4xmAEAoAEBuAEC&sclient=gws-wiz

[Símon Pétur frá Hákoti (IP-tala skráð) 11.12.2021 kl. 15:09]

Einhvern veginn er ég þannig gerður, 

að eygja stundum þá von, að geti orðið góður hestur úr göldum/gölnum fola; að menn geti vitkast með árunum og oft sé betra að lempa hluti til betri vegar,  með góðu, en höggva þá í spað, þó eflaust þyki ýmsum sem "öxin og jörðin geymi þá best".

Mér, sem þér og fleirum, er vel kunnugt um fíflsku Ásgeirs, er Kaupthinking og gömmun varðar

En ég vil sem sagt trúa því að betra sé að lempa hann til betri vegar, með góðu. 

Og ekki vil ég fylkja með víkingi, sem herjar hingað frá norskum ströndum og hótar málsókn fyrir norskum dómstóli. Nóg var að fá þann norska hingað sem seðlabankastjóra, á tímum heiftarstefnu Jóhönnu og Steingríms Joð.

Við þetta vil ég bæta, að pistill þinn er samt fjörmikill og skemmtilegur. 

[Magnús Sigurðsson, 11.12.2021 kl. 15:29]

Sínum augum lítur hver ættarsilfrið Símon Pétur. En eitt veit ég fyrir víst að ég mun aldrei hafa nokkur tök á að lempa seðlabakastjóra til.

Og ég er langt frá því að vera viss um að að það "þjóðaröryggisráð" sem flaggaði honum fyrr á dögum hafi ekki nýverið selt greiðslumiðlunina úr landi sem bjargaði því sem bjargað varð 2008.

Þá miðlun sem seðlabankastjóri hefur varfærnislega haft á orði að notendur bankanna muni nú þurfa að fjármagna upp á nýtt innanlands með færslugjöldum.

Ef ég ætlaði mér að gera góðan hest úr svo gölnum fola held ég að gæti kallast gerenda meðvirkur.

[Símon Pétur frá Hákoti (IP-tala skráð) 11.12.2021 kl. 16:54]

Sæll Magnús, og takk fyrir gott svar.

Um fyrri brek Ásgeirs þarf ekki að fjölyrða.

Um þau erum við fyllilega sammála.

Hvort hann sé enn bersyndugur eftir að hann varð seðlabankastjóri má hins vegar deila.  Ég vil trúa því að hann reyni nú að bæta fyrir sínar fyrri syndir, og ekki var það hann sem seldi greiðslumiðlunina úr landi, heldur reynir nú að finna leiðir til að ná henni aftur til landsins.

Svo má einnig velta því fyrir sér, hvað búi að baki aðför Bergsveins að Ásgeiri.  Hver er undirrót hennar?  Held að þar ráði ekki einungis tilkallið til einkaréttar rostunga-veiðiþræla-kenningarinnar.  Eða hvað?  Hvað segir Fornólfur um það? 

Já, Guð blessi Ísland.

[Grímur Kjartansson, 11.12.2021 kl. 17:16]

Ég og móðir mín lásum og ræddum um "Leitina að svarta víkingnum" og höfðum gaman af því þar var bent á hluti sem manni þótti borðleggjandi varðandi hagkerfi Íslands á þeim tíma. Ætli maður neyðist ekki til að lesa bók Ásgeirs til að hafa einhverja skoðun?
Þó svo að seint verði ég titlaður hagfræðingur finnst mér bókinn
Why Iceland?: How One of the World's Smallest Countries Became the Meltdown's Biggest Casualty Kindle Edition - 24$ óheyrilega dýr

[Símon Pétur frá Hákoti (IP-tala skráð) 11.12.2021 kl. 17:42]

Nú fór í verra, því í seinni athugasemd minni af þeim tveimur fyrri, misritaði ég Fornleif sem Fornólf.  Biðst innilega afsökunar á því.  En mér til afsökunar er að maður er orðinn gjörsamlega ruglaður á þessum tímum allra kó-vit-ólfanna.

[Ómar Geirsson, 11.12.2021 kl. 18:26]

Góðir, allir sem einn.

Ég mæli með jólabókinni; Hvað varð af Gjaldeyrissjóðnum, undirtitill: alltí lagi hér.

Kveðja að austan.

[Magnús Sigurðsson, 11.12.2021 kl. 19:14]

Ég aðhyllist nú reyndar ekki þá kenningu að 2 + 2 þurfi að vera 4 frekar en mér sýnist. Þeir sem kunna með stærðfæði að fara vita að sú niðurstaða er samkomulagsatriði. En vil þó benda á í þessu samhengi að sama ár og Fjármálaeftirlitið fór í Seðlabankann var ráðinn þar engilbjartur maður sem nýr seðlabankastjóri.

Svo einkennilega vill til að 2 árum seinna hafði greiðslumiðlun Jóns, Gunnu, Bjarts í Sumarhúsum og Gróu á leiti, verið seld á einu bretti, án þess að þau hefðu grænan grun um, til lands sem hýsir ríki Gyðinga við Miðjarðarhaf, -Ísraels. Eins gott að ekki birtist icesave draugurinn afturgengin svo ekki sé nú meira sagt. 

Hvort aðdragandi þessa gjörnings fór gjörsamlega fram hjá fjármáleftirlitinu í Seðlabankanum o.þ.m.t. seðlabankastjóra veit ég náttúrulega ekkert um, en mér finnst við hæfi að hann bæti þeirri bankabók við jólabókaflóðið. Auðvitað fagna ég því að Why Iceland viðundrið hafi áhuga á þjóðlegum bókmenntum. En tel þó að honum færi betur á að leifa þeim að eiga sviðið sem best fara með þann penna frekar en að sitja undir aðdróttunum um hnupl.

Varðandi Fornleif þá hefur hann ekki legið á því að honum finnst afskaplega lítið koma til hugarflugs og millilínulestursbókmennta þeirra Svarta víkingsins og Bjarna í Stöð. Honum hefur samt varla verið meira niðri fyrir síðan Miðhúsasilfrið komst á metsölulistann. Ég vil einfaldlega meina að Bergsveinn, Bjarni og Kristján Eldjárn, hafi og séu, allir vel færir um að greina millilínulestur í bland við torf og grjót. Eitt er víst að þeir kunna að vekja áhuga landans á sinni arfleið betur en sá sem reyndi það aflands með Why Iceland?

[Magnús Sigurðsson, 11.12.2021 kl. 19:21]

Sæll Ómar gott að heyra og ekki síður að við erum sammála um jólabókina. Ég tók eftir því að þú varst farinn að rífa kjaft á öðrum bæjum. Er farinn að sakna kraftmikilla pistla um eitthvað annað en tölfræðina í kringum helvítis pestina. Kveðja í neðra.

[Símon Pétur frá Hákoti (IP-tala skráð) 11.12.2021 kl. 19:33]

Takk fyrir greinargott svar, Magnús.

Svo vel flytur þú mál þitt, að ég þarf nú um stund að leggjast undir feld og hugleiða allt það sem þú, vissulega, bendir réttilega á og það af góðri málafylgju.  Hefur það allt dýpkað málið.

[Magnús Sigurðsson, 11.12.2021 kl. 20:24]

Þakka þér fyrir Símon Pétur, ég verð reyndar að segja eins og er að hugurinn hefur hvarflað frá forsögunni, rétt eins og hjá þér, og þrátt fyrir áhugann fyrir arfi okkar allra látið kyrrt liggja í þeirri von að batnandi manni sé best að lifa. En þegar ég sá í fréttum að seðlabankastjóri gat ekki einu sinni beðist velvirðingar á því að hafa sést yfir að vísa til heimilda og látið svarta víkinginn njóta sannmælis þá féll mér allur ketill í eld hvað góðan ásetning til fortíðarinnar varðar.

[Þorsteinn Siglaugsson, 11.12.2021 kl. 20:49]

Maður verður aldrei fyrir vonbrigðum með pistlana þína Magnús minn.

[Ómar Geirsson, 11.12.2021 kl. 23:08]

Blessaður Magnús.

Allt þjónar sínum tilgangi, þar með það sem þú kallar réttilega að rífa kjaft á annarra manna bæjum.

Best ég skýri mál mitt með smá sögu úr sagnaminni okkar hér í neðra. Það var þannig með einn ágætis mann, fermingarbróðir meir að segja, nú burtfluttan, að hann þroskaði með sér þann ósið á efri unglingsárum að gera sér skemmtun að reyna narra menn með ýmsum upplognum sögum sem hann ætlaðist til að færu svo lengra, og ef það tókst, þá sagði hann fleirum en vildu hlusta frá því afreki sínu.

Og skemmti sér alveg ágætlega til að byrja með, svona einu sinni eða tvisvar, en svo einhvern veginn gekk þetta ekki hjá honum, nema hann áttaði sig ekki á því, að maður hélt, því vaninn varð að ávana.

Svo var það eitt sinni að hann var fyrstur með fréttirnar, alvöru gaman hneykslissögu um ákveðinn góðborgara hér í bæ, og honum fannst sagan það fréttnæm, að hann tók sér frí úr vinnu sinni (þeim sem keypti útselda vinnu hans til lítillar ánægju) og fór víða um bæ til að segja fréttirnar, og þar sem hann sagði nú einu sinni satt, og þó maður héldi annað, þá vissi hann uppá sig skömmina því áður en fólk gafst ráðrúm til að setja upp vantrúarsvipinn eða réttara sagt háðsglottið (byrjar hann nú einu sinni enn), þá bætti hann við, "þetta er alveg dagsatt, ég er segja satt,(Núna)", eða þannig var mér sögð sagan því ég var borginni þegar þetta gerðist.

Gamansagan (hneykslaði þá sem vilja hneykslast) var reyndar bráðfyndin, en fyndnast af öllu þótti fólki hvernig viðkomandi sagði söguna. "Ha trúið þið mér ekki, ég er að segja satt", eitthvað sem hann hafði aldrei heyrst segja fyrr eða síðar.

Það er nú svo Magnús, það er auðveldara að koma sér í hundskjaftinn en að koma sér úr honum, og þó ég sé ekki mikið að eltast við gustukaverkin hér í netheimum, þá eru þau samt stundum nauðsynleg ef ég sé fyrir mér að þurfa manna skotgröf með viðkomandi í baráttu við sameiginlega fjandvini, þá koma púðurskot ótrúverðugleikans að litlu gagni.

Ekki að ég sjái fyrir mér að manna nokkra skotgröf í bráð, ég held að það komi ekki til þeirra afglapa að fetað verði í fótspor erlendra ofríkismanna og herjað á hluta þjóðarinnar fyrir að standa á sannfæringu sinni, það er síðan lengra í aðra kólgubakka út við sjóndeildarhringinn, ekki einu sinni víst að nokkuð verði úr þeim annað en goluþytur sem maður leiðir hjá sér.

Ég skil síðan vel Magnús að þú nennir ekki að kíkja við hjá mér til að lesa pistla um tölfræði helv. pestarinnar, hvort sem þeir eru kraftmiklir eður ei, en ég get fullvissað þig um að ég hætti að skamma börnin út frá þeirri tölfræði eftir að ég var fullviss um að strákarnir mínir fengju að spila fótbolta í friði í sumar, og minntist aðeins á pestina í tveimur eða þremur pistlum í sumar, þegar, eftir að ég var búinn að skammast út í börnin, spurði af hverju það væri ekki treyst á varnirnar fyrst menn voru á annað borð að hafa fyrir því að koma þeim á laggirnar.  Svo rammt kvað að þeim spurningum að félagi Þorsteinn fann sig knúinn til að tjá samstöðu, og ég held að það hafi farið svo illa í hann að hann fékk jafnvel svima á eftir, ég sjálfur hnerraði. 

Hins vegar hef ég skrifað um loftslagstrúða og hvimleiðar Gróur, alveg ágæta pistla þó ég segi sjálfur frá, og þeir hafa fengið ágætar undirtektir margir hverjir, þó kannski ekki alltaf á sömu forsendum og ég skrifaði út frá. 

En vissulega hef ég ekki sótt í smiðju kraftaskálda undir Jökli í skrifum mínum um núverandi stjórnvöld, en það er bara svo Magnús, að þegar ég áttaði mig á að allar skammir þar um voru næring fyrir það fólk í stjórnmálum sem ég hef á mestu skömmina, þá ætlaði ég alla vega ekki vera þátttakandi í þeirri fóðrun.

Þetta snýst ekki um þá sem eru skömminni skástir, þetta snýst um þá sem eru verra en það sem vont er.

Það vantar valkostinn Magnús, hann er á vergangi, ég er jafnvel farinn að efast um að vonin lifi í einhverjum afviknum dal, bíðandi eftir Gróandanum.

En ef innherjaráðherrann ætlar að ganga erinda andskotana, þá mun ég jafnvel gera mér Smárann að góðu sem samherja í næstu skotgröf.

Burtséð frá fortíð hans.

En á meðan er það kveðjan úr stórrigningu sunnan þeysins, megi klakinn á götunum ykkar í efra hverfa í komandi hlýindum eins og hann er hverfa hjá okkur í neðra.

Við látum okkur þína kraftmiklu pistla duga í bili Magnús.

[FORNLEIFUR, 12.12.2021 kl. 06:11]

Froða þín í garð Sverris Jakobssonar, systur hans, forsætisráðherrans, já og jafnvel sletta á Fornleif sjálfan, er frekar ómerkileg. Það er ekki nóg "að halda með einhverjum" - menn verða einnig að undirbyggja skoðun sína þegar þeir góla á hanabjálkanum. Hvað varðar silfur sem ekki fellur á fyrir Austan, þá má þess geta að breskur sérfræðingur felldi dóminn um silfrið. Kristján Eldjárn furðaði sig reyndar einnig á hreinleika silfursins. Breskur sérfræðingur fordæmdi rannsókn á silfrinu sem fór fram í Kaupmannahöfn. Nú, ef menn eru farnir að trúa "Svarta Víkingnum" sem fræðum á Austurlandi, er lítið hægt að hjálpa ykkur.

Þegar menn vita ekkert hvað þeir eru að skrifa um, verður það oft hálfgert gól. Því miður gólar þú nú Magnús og slettir steypu. En þér er vitanlega heimilt að trúa því að Geirmundur Heljarskinn hafi verið hálfgerður Kínverji. Móðir hans var frá Bjarmalandi, en þar voru engir aðkomumenn af "mongólskum" uppruna á þeim tíma sem Geirmundur var uppi. Hvernig Bergsveinn gat soðið það út úr stórfenglegum rannsóknum sínum að Geirmundur hafi verið eins konar  minoritetsbarn frá Noregi og tvífari kokksins á Asíu(sem er því miður búið að loka) er mér hulin ráðgáta. Nú rosmhvalaævintýrið sem Bergsveinn telur Ásgeir ræna úr heilabúi sínu er einnig rugl. Menn varða að vinna heimavinnuna sína betur, líkt og Sverrir gerir ávallt, Katrín líka og ekki síst Fornleifur og ritstjórn hans.

[Magnús Sigurðsson, 12.12.2021 kl. 06:46]

Sæll Ómar, já ég tók einmitt eftir því að þú hafðir tekið upp þann plagsið að rífa kjaft á öðrum bæjum ásamt torkennilegu flækings greyi sem kallar sig Vagn.

Þetta nær náttúrulega engu tali með fermingarbróðirinn. Mér flaug nú reyndar fyrst í hug, þegar ég las, hvort Þórólfur hefði ekki örugglega verið á Eskifirði, en svo kom ég til sjálfs míns í morgunn sárið. Hanna er auðvitað líka eldri nema þá að hann hafi fermst seint. Enn það voru góðir tímar þegar menn gátu staðreynt svona ófögnuð, nú þurfa menn bæði að slökkva á sjónvarpinu og símanum til þess.

Varðandi loftslags-pestar-talnasummur, súlurit og spálíkönin, vil ég það eitt segja að við pappakassa rökræðir maður ekki, -það er bara þannig. Jafnvel þó svo að hann sé stútfullur af vísindum sem kallaðar eru staðreyndir. Hvað þá ef staðreyndirnar eru fengnar úr stormi í vatnsglasi til að setja í spálíkan. Og ætla ég þá alveg að sleppa því að tala um tómu tunnuna í því sambandi.

Hérna í efra hafa allir blessunarlega sloppið við skella á trýnið á svellunum, að ég best veit. Ég hef trú á að það sé vegna frábærra sóttvarna. Börn og fullorðnir standa þétt saman á glærunni í biðröð niður á nesi og hafa stuðning hvort að öðru, bíðandi eftir að pestar pinnanum sé snúið upp í kuldablár nasirnar svo greina megi hvort þau séu haldin drepsótt.

Annars átti þessi pistill nú reyndar að fjalla um hvort hugverki hefði verið hnuplað af Svarta víkingnum, úr bók sem við höfum báðir mikið dálæti á, svo ég læt staðar numið núna. 

Hugheilar bata kveðjur í neðra og vonandi hafa engir liðið út af, hvorki á svellunum né af pestinni.

Úr flughálu morgunn myrkrinu í efra. 

[Magnús Sigurðsson, 12.12.2021 kl. 07:22]

Þakka þér fyrir innlitið Fornleifur, og að halda þig við efni pistilsins. Áhugavert að heyra hvað það liggur kýrskýrt fyrir hjá latínusamfélaginu að engir skáeygir hafi verið í Bjarmalandi fyrir hart nær 1.300 árum síðan. Það þarf þá ekki að grafast meira fyrir um það.

Varðandi Miðhúsasilfrið þá voru reyndar gerðar fleiri rannsóknir á því en sú sem breski sérfræðingurinn gerði. Ein var svo umfangsmikil að hún var kölluð lokarannsókn, um allar þessar rannsóknir og blaðaskrif. Lét ég mig hafa það að lesa þá rannsókn.

Það sem mér sveið við þann lestur var að fólk sem ég hef þekkt frá því ég man eftir mér var gert að silfursjóðsfölsurum og hefðu lagt talsvert á sig til að komast í sviðsljós fjölmiðlanna, -jafnvel bæði æruna og ættarsilfrið.

Í loka rannsókninni kom m.a. fram að hagur húsgagnasmiður hefði verið gerður að silfursmið. Að silfurblandan sem m.a. átti að vera í falsaða sjóðnum hefði þrátt fyrir allt verið til heimshluta Héðins Hjarrandasonar á víkingaöld, en hann kom víst frá Serklandi eins og þú væntanlega veist núna.

Ég ætla að biðja þig þess lengstan orða Fornleifur minn, elsku kallinn, að hengja ekki fleiri bakara fyrir smiði hérna fyrir austan og skiptir þá ekki heldur máli hvort þeir steypi með torfi eða sementi.

Það geta allir lesið um Miðhúsasilfrið, sem hafa til þess nennu, en ég efast um að silfursjóður frá víkingaöld finnist í bráð á Íslandi.

[Ómar Geirsson, 12.12.2021 kl. 11:17]

Góðan daginn Magnús.

Vissulega var hann um eitthvað hnupl, en lýsing þín á öðrum deilanda var mögnuð ádeila sem hefði sómt sér vel meðan kraftaskálda undir Jökli forðum daga.

Segðu svo að sóttvarnir hafi ekki komið að gagni þó óbeint sé, já og hættu að móðga mig með því að kenna mig við litla útskotið inn af miðjum Reyðarfirðinum, þess eini tilgangurinn var að láta tign Hólmatindsins njóta sín sem óður til fegurðarinnar.

Gangi þér vel með Fornleif.

Kveðja úr sunnan golunni í neðra.

[Magnús Sigurðsson, 12.12.2021 kl. 12:28]

Sæll Ómar, nú glampar á svellin og himnarnir loga hér efra og neðra. Hann er aldrei fallegri himininn en í skammdeginu hvað þá þegar hann tvöfaldast á jörðu niðri í gljánni. 

Ég myndi nú aldrei ruglast á þér og Hólmatindinum þó vankaður eftir fall á svelli væri, og ekki á ég von á öðru að nú sé fagurt í golu gjóstinum á svellunum í neðra þó svo að ekki svífi yfir þeim stjörnurnar.

Þér að segja þá hef ég alltaf kunnað einstaklega vel við allt í neðra og hef aldrei skilið þá í efra sem fjargviðrast út í það sem  þar er til staðar. 

Með glampandi kveðjum úr efra.