Japl, jaml og fuður

Nú þegar einkennalausa drepsóttin er í andaslitrunum, gæti allt eins geispað golunni innan tveggja vikna samkvæmt fálkanum á seiðhjallinum, er loksins kominn góður skriður á Samherjamálið. Það er ánægjulegt að réttarríkið falli ekki í sama pytt og bananalýðveldi Afríku þar sem hálf ríkisstjórnin er komi á bak við lás og slá vegna einhvers verbúðar kjaftæðis.

Litlu lukkudýrin í dúkkulísudrögtunum fá þar að auki baða sig í sviðsljósum landsins bláa og flissa fallega, með þeim frábæra árangri að rússneski herinn hefur hörfað enn lengra í viðskiptabanninu. Fjölmiðlar styðja svo við lýðræðið sem aldrei fyrr með því að eyða falsfréttum á meðgjöf frá ríkinu og nú er komið að þeim tímamóta áfanga að ráða 800 hálaunaða sérfræðinga við hugverkasölu frá Íslandsstofu án starfstöðvar og vinnuskildu. Enda heimurinn orðin að sviðsmyndum í sýndarveruleika spálíkansins sem hægt er að vera á fjarfundi með í símanum sínum. Google hvað?

Já það verður ekki annað sagt en að allt leiki í lindi og drjúpi smjör af hverju strái í CE vottuðu fjósinu, og gamla góða komma grýla búin að koma strandveiðunum fyrir í flottrolli frjálsa framsalsins. Það kemur því hreint ekki á óvart að silfurskeiðungur í allt of litlum bláum jakkafötum átelji vinnubrögð fjölmiðla í samherjamálum eftir samstöðuna alla dularfullu drepsóttinni. Engu líkara en lögreglan megi ekki lengur spyrja sakbitna farísea og fræðimenn út úr, þá sem réttarríkið hefur borið á höndum sér frá Pontíusi til Pílatusar á ríkisstyrkjum gegnum allt heila pestar og metoo fárið.

Ofurbloggarinn, sem slengir nú út sleggjudómum á færibandi, verður væntanlega gerður að næsta dómsmálaráðherra vegna frábærs árangurs í starfi. Sá núverandi er hvort því sem er ekki lengur á vetur setjandi eftir að hann hættir að gefa niðursetninga útlendingastofnunnar á garða valinkunnra lögfræðinga á sérfræðilaunum, sem alþingi hefur keppst við að útvega verkefni undanfarin ár við að snúa út úr réttlætinu með því að fara í kringum siðferðilegan lagabókstafinn samkvæmt glóbalnum.

Eins og segir í vísunni; -eftir japl, jaml og fuður Jón var grafinn út og suður.

Já og vel á minnst, -Guð blessi Ísland , , , -og Gunnu.

Athugasemdir

[Þorsteinn Briem, 17.2.2022 kl. 07:35]

Rússneski herinn var fljótur að láta sig hverfa frá landamærunum að Úkraínu þegar utanríkisráðherra Mörlendinga, frú Reykfjörð, hótaði hernum öllu illu.

Rétt eins og sást undir iljarnar á sovéska hernum í Eystrasaltsríkjunum þegar þáverandi utanríkisráðherra Mörlands, Jón Baldvin Hannibalsson, birtist þar undir áhrifum áfengis og til alls vís.

[Þorsteinn Briem, 17.2.2022 kl. 09:12]

Rússneskir og sovéskir ráðamenn hafa alltaf verið skíthræddir við Mörlendinga og hlýtt þeim í einu og öllu.

Þannig skrifaði Andrei Gromyko, utanríkisráðherra Sovétríkjanna í þrjá áratugi, undir leyfi Óla föðurbróður til að heimsækja Kötu sína á bannsvæði Rauða hersins í Kislovodsk í Kákasus.

Ólafur Briem

[Jónatan Karlsson, 17.2.2022 kl. 11:14]

Sannarlega farið yfir víðan völl í léttu og hnitmiðuðu máli.

[Magnús Sigurðsson, 17.2.2022 kl. 12:58]

Það þurfti ekki einu sinni mikla mör Steini, svo björninn legði á flótta í þetta sinn. Rétt svo að flikka upp á höfuðstöðvar NATO með heimsókn í þetta skiptið, þurfti ekki einu sinni að splæsa í bús hvað þá Bermúdaskál eins og um árið.

Þakka þér fyrir Jónatan, það er sjaldan sem japl, jaml og fuður verður hnitmiðað.

[Þórhallur Pálsson, 17.2.2022 kl. 16:40]

Minn kæri sveitungi:
Það er gaman að lesa skrifin þín þegar þú lætur vaða á súðum, en fyrir alla muni, ekki ruglast á persónum í guðspjallinu, ef þú vitnar í þær.  Pontíus og Pílatus var nefnilega einn og sami maðurinn og mun hafa heitið Pontíus Pílatus.
Þessi kall og hann Heródes voru eitthvað að senda krist á milli sín, ef ég man rétt.
Svo annað:  Jón sem var grafinn út og suður hafði viðurnefnið "hrak".  Hans er ekki getið í neinni vísu, svo ég viti, en hins vegar í kvæði eftir Stephan G.
Það kvæði er vert aflestrar og ekki lakara að kunna það utan að, helst allt frá byrjun til enda.
Bestu kveðjur.

[Magnús Sigurðsson, 17.2.2022 kl. 17:31]

Sæll Þórhallur, þetta með Pontíus og Pílatus er rangur misskilningur, sem kom upp á dögum Heródesr. Þegar fræðimönnunum var kennt um illvirkin. Að Jón sé hrak er svo annar rangur misskilningur, álíka og fulli Svíinn í Stellu i orlofi.

Þarna er um þau heiðurshjónin Jón og Gunnu að ræða. Ég fæ ekki betur séð en að búið sé að ganga endanlega frá honum Jóni rétt eins og öllu heila feðraveldinu. Blessuð sé minning hans. Tel þó enn rétt að biðja bæði fyrir Íslandi og Gunnu.

En eins og þú bendir réttilega á þá er þetta engin þjóðvísa heldur er verið að misnota ágætt ljóði um ákveðið úrræði eftir Stephan G Stephensen. Hvenær svo sem hann var við jarðaför í Fljótsdal. Þessi pistill er samt sem áður algjört japl, jaml og fuður.