Sjúklingum sinnt í nefnd

Nú er svo komið á landinu bláa að bráðamóttakan er komin í nefnd, heilu hallirnar byggðar með handabandi og opinber þjónusta er í fjarfundarbúnaði. Litlu lukkudýrin með milljónirnar á mánuði, í allt of litlu bláu jakkafötunum og dúkkulísudrögtunum eru nú sem betur fer á leiðinni í langþráð sumarfrí þannig að von er til að vinnufriður verði um stund.

Enn og aftur leggur þessi síða til að allt lið flissandi fábjána verði sent sumarlangt úr landi eins og suðfé sem rekið er á fjall svo stundlegur friður verði fyrir þeirra flóknu úrlausnum  úr spálíkönum sýndarveruleikans og sérfræðingum sem stunda neyðarhjálp í nefndum með selfí símanum sínum.

Litlu flissandi lukkudýrin mættu þess vegna halda milljónunum á mánuði sem meðgjöf frá skattgreiðendum sumarlangt á fjöllum, bara svo mikið að þeim kæmi til hugar, áður en þau fara í langþráð fríið, að fækka nefndum með engum efndum og bæðu öll þau mannauðsteymi er dögum saman sitja á nefndarfundum, -þess í stað um að vinna vinnuna sína.

„Gríðarlega flókið verkefni“

Athugasemdir

[Ingólfur Sigurðsson, 15.6.2022 kl. 23:19]

Nú er kreppa kölluð "stormur". Hagfræðingar segja að "stormur" sé í vændum. Já, eins og annað má ekki kalla hlutina sínum réttu nöfnum, og útlitið skiptir öllu máli, ekki innihaldið.

Munurinn á þessu og 2008 er að þá bjuggust færri við kreppu. Nú er það búið að vera ljóst lengi að hæfni þeirra sem fá ofurlaun og bera "ábyrgð" (eða hlaupast undan henni réttara sagt) er ekki næg. 

Jafnvel Egill Helgason sem var með svo vandað og gagnrýnið Silfur Egils 2007 varaði við þessu, fékk menn eins og Jóhannes Björn, blessuð sé minning hans í þáttinn til sín. 

Sá maður fékk ekki næga athygli á síðasta áratug. Hann var í fullu fjöri þegar hann féll frá á þessu ári og skrifaði frábærar greinar á Facebooksíðu sína. Ástandið á RÚV er því miður orðið svo slæmt að fólk sem hefur hæfileika eins og Egill fær ekki að njóta sín, og það sveigir frekar þætti sína að meginstraumnum, þar sem sannleikanum er haldið fjarri.

Já, það er æðri máttarvöld sem eru nauðsynleg þegar svo er komið, en hversu margir trúa á þau?

Hvernig ætli heimurinn líti út eftir þetta? Verða þá Kínverjar með banka á Vesturlöndum og ráðandi hér mestu? 

Verst er þó njósnakerfið þeirra með eigin þegnum og þeirra hlýðni og hegðun, sem sennilega er komið líka upp hjá svonefndum lýðræðislegum valdhöfum hér í vestrinu, í einhverri mynd.

Jæja, ég ætla að hafa trú á minni þjóð ennþá, að þjóðin sem átti Jónas Hallgrímsson láti ekki hlekkja sig að eilífu.

Takk fyrir vekjandi pistil.

[Helga Kristjánsdóttir, 16.6.2022 kl. 01:24]

Einmitt! 2008,trúði ég að tryggðarböndin væru sterkari en ágirnd í Evrópu embætti eða það sem sóst var eftir hjá Sameinuðu þjóðunum,bullandi spilltu.
Gaf mér tíma að fylgjast með atkvæðagreiðslum um hin ýmsu mál á Alþingi sem var send út á 2.Rúv-rás.Hugsa oft til Jóns Vals heitins vinar míns,sérstaklega held  ég að hann hefði komist á þing núna; En þarna er bara  einn herskár sem er greinilega búin að fá nóg af yfirgangi, Sigmundur Davíð eldklár islenskur. 

[Magnús Sigurðsson, 16.6.2022 kl. 05:47]

Takk fyrir kjarnyrtar athugasemdir Ingólfur og Helga.

Ingólfur; það hefur verið um langan tíma sem ekki hefur mátt kalla hlutina réttum nöfnum, kreppa í góðæri til lands og sjávar eru álíka öfugmæli og stormur í vatnsglasi, við getum minnst þess frá því 2008. Ástand sem var ekkert annað en leti, óstjórn og græðgi.

Ég var svo lánsamur að lesa bók Jóhannesar Björns Lúðvíkssonar, -Falið vald, fyrir tvítugt og hef alla ævi verið gagnrýninn á það hvernig medía valdahafa skilgreinir tíðarandann. Já blessuð sé minning Jóhannesar.

Það er meiri ástæða til að hafa trú á landvættunum en stjórnmálamönnum og íslensku þjóðinni nú um mundir, rétt eins og síðast, þegar Eyjafjallajökull spúði eimyrju yfir Breta og ESB í kjölfar hryðjuverkalaga og svívirðilegrar tilraunar fjárkúgunar. Að vísu stóðst íslenska þjóðin þá icesave trix elítunnar og því er rétt að halda til haga.

Helga; nú er skarð fyrir skildi á moggablogginu margir skeleggir rýnendur fallnir frá og kominn tími á að fylla þeirra skörð á áberandi stað í umræðunni, t.d. með mönnum eins og Ingólfi.

Ég er svo lánsamur að horfa aldrei á sjónvarp né síma, og veit því lítið um kjaftavaðalinn á alþingi, annað en það sem lesa  má á í tölvunni minni. -Guð sé oss næstur ásamt landvættunum svo ég segi nú ekki meira.

Það sagði maður, -sem stundum aðstoðar okkur félagana í steypunni, þegar hann sat með okkur í kaffi í gær og einn félaginn lýsti því yfir að það væri ekki til setunnar boðið því alltaf bættist við verkefnin, -að nú dygði ekkert minna en að sitja sem fastast og skipuleggja. Mér datt sí svona í hug þegar ég setti saman þennan pistil að þessi ráðahagur væri viðhafður við nefndarskipanir.