Upplýsingaóreiðan á óvissustigi

Það hefur fátt farið hærra síðast sólahringinn en árás Rússa á Árvakur. Ef hún var ekki að undirlagi rússnesku mafíunnar, þá mætti helst að ætla að Pútin sjálfur hafi átt frumkvæðið. Litla lukkudísin sem kom í veg fyrir falsfréttir á Íslandi sagði reyndar á facebook að þetta hefði verið árás á sjálft lýðræðið.

Síðan tók sú lýðræðiselskandi undir, -einmitt sú sem er allt í öllu hjá Blaðamannafélagi Íslands, -og taldi þetta árás á lýðræðið, auk þess á sjálft málfrelsið og krafðist opinberrar rannsóknar. Þær ættu svo sem að vita það litlu lukkudísirnar eftir að búið er að koma flestum fjölmiðlum landsins á ríkisspenann, þannig að sjálft Sovétið bliknar með Prövdu að vopni gegn upplýsingaóreiðunni, -sælla minninga.

Því verður varla á móti mælt að best fer á að ráðandi öfl sjái um að málfrelsið fylgi línunni svo ekki verði sagðar falsfréttir. Nú má ætla að siðfræðingarnir í skrímsladeildinni sýni af sér fádæma rannsóknablaðamennsku og niðurstöðum rannsókananna verði útvarpað opinberlega í morgunnsárið á RÚV, sem hefur lagt það í vana sinn að lepja upp upp úr mbl á morgnanna, -eða allt þar til rannsóknablaðamennirnir þar á bæ rumska til skrúfa sjálfir frá gúggluðum krananum á CNN.

Aðferðafræði Morgunnblaðsins í gegnum tíðina við að taka á upplýsingaóreiðunni hefur verið sú að þegja fréttir frekar en að segja, -það er að segja það sem almælt er svona rétt eins og RÚV gerir nú í Namibíusvindlinu. Þannig hefur t.d. öllum fjölmiðlum á ríkisspenanum tekist að þegja bloggið hans Halls Hallsonar í hel, jafnvel þó svo að Hallur hafi verið með lögregluna á hælunum. En hvorki mbl né RÚV tókst samt að segja fyrrverandi flissandi forsætisráðherra til Bessastaða.

Auðvitað er það alvarlegt mál ef slokknar á blogginu í netárásum, því þá fyrst verður málfrelsið fyrir lýðræðislegum skaða. Það gæti meir að segja kaldastríðskumlið átt eftir að láta glamra á milli fölsku tannanna, ranghvolft um leið augunum líkt og gutlandi spæleggjum innan við ferköntuðu flöskubotnagleraugun, -þegar svona bellibrögð eru annars vegar.

Athugasemdir

[Jósef Smári Ásmundsson (IP-tala skráð) 25.6.2024 kl. 09:08]

Í fyrsta lagi eru það einungis vangaveltur að þessi netárás komi frá rússneskum yfirvöldum eða rússum yfirleitt.Hugsanlega er morgunblaðið auðvelt skotmark út af miklu streymi erlendis frá og þessvegna veikast hlekkurinn. Á blogginu hefur verið áberandi launaður útsendari kremlar sem hefur flutt falsfréttir og áróður Pútíns og hversvegna ætti þá moskvuvaldið að eyðileggja fyrir honum . Að tala um árás á lýðræðið er algjört bull. Blaðamennska hefur ekkert með lýðræði að gera. Hugsanlega eru þessir glæpamenn með birt ljóð, krossgátur og dánarilkynningar í fórum sínum sem þeir vilja fá pening fyrir.

[Dominus Sanctus., 25.6.2024 kl. 12:45]

RINGULREIÐIN virðist tröll-ríða bæði rúv og net-mogganum:

[Magnús Sigurðsson, 25.6.2024 kl. 13:03]

Mig grunar að þið hafið nokkuð til ykkar máls, Jósef Smári og Dominus. Bloggið er enn, sem betur fer, málfrjálst.

[Jóhann Elíasson, 26.6.2024 kl. 07:06]

Hvernig vita Moggamenn að það séu Rússar sem standa á bak við þessar árásir????  Það er alltaf fullyrt að þarna sé um Rússa að ræða, mér finnst menn nokkuð fullyrðingaglaðir, eru Rússar kannski þeir einu sem hafa kunnáttu og getu í þessar tölvuárásir?????

[Magnús Sigurðsson, 26.6.2024 kl. 13:55]

Þetta er góð spurning Jóhann.

Ég sá frétt um að ríkisstjórnin hefði rætt málið í gær og þrjár fréttir þar sem dúkkulísur ríkisstjórnarinnar í ráðherrastöðum tjáðu sig um málið og gerði allar að því skóna að um Rússa væri að ræða.

Mér skilst að það standi jafnvel til að vernda fjölmiðla gegn tölvuárásum, en lítið var talað um sannanir á því hverjir væru ábyrgir, -eða opinbera rannsókn eins og formaður BÍ ympraði á.

Mbl hefur verið með hverja kynningafréttina af annarri um tölvuséní sem taka að sér að verja tölvukerfi fyrirtækja fyrir netárásum.

Mér kæmi ekkert sérstaklega á óvart að í þessu gilti hið fornkveðna eins og svo mörgu öðru, -follow the money.

[Grímur Kjartansson, 26.6.2024 kl. 18:47]

2010 voru allar netárásir í heiminum taldar koma frá Norður Kóreu

Svo voru allar netárásir taldar koma frá Úkraínu en eftir að Trump vann forsetakosningarnar þá var byrjað að kenna Rússunum um

en eftir að Pútín réðist inn í Úkraínu þá eru rússar taldir bera ábyrgð á öllum tölvuvandræðum í heiminum

[Magnús Sigurðsson, 26.6.2024 kl. 19:56]

Góð söguupprifjun Grímur, -og nú hyggst ríkisstjórnin standa vörð um fjölmiðlana lýðræðisins vegna, bæta netvörnum við ríkisstyrkta upplýsingaóreiðuna.

Þannig að á endanum verður þetta nokkurskonar securitas dæmi. Undanfarið hefur það verið tíundað í ríkisstyrktum fjölmiðlum landsins hverjir eru best til fallnir að fara með netvarnirnar. Því segi ég, -follow the money.

Skrímsladeildin fer létt með þetta dæmi, þó henni hafi ekki tekist að kjafta fyrrverandi flissandi til Bessastaða.