The Art of the Deal

Það hefur verið undarlegt að fylgjast með hveitibrauðsdögum Valkyrju- stjórnarinnar. Byrjað var á að óska eftir sparnaðartillögum frá almenningi, og í kjölfarið hamrað á því að ekki yrði farið í nein ný fjárútlát á árinu, nema skorin yrðu niður útgjöld á móti.

Síðan fetuðu tvær valkyrjur, -þær með skúffuna og pottinn, -í fótspor Davos dúkkulísanna, sem smurðu kyssitauið reglulega eins og kannski einhver gullfiskurinn man, -og héldu til Kænugarðs til að tárast með afskrifuðum stríðsherra, sem hefur talið fraukum Evrópu trú um að vera að verja fyrir þær lýðræðið.

Innsti koppur í búri, -já einmitt sá með ríkiskassann, -hefur ekki haft tóm til að nýta sér sparnaðar tillögur almennings hvað þá skera niður. Ef hann hefur ekki verið upptekinn viða að telja krónur í Kúlulánadrottninguna eða Lukkupottinn, þá hefur hann verið að verja vini sína í klaninu vegna ostasvindlsins. Nú liggur loks fyrir fordæmi hvernig farið var með sígrettusvindlið, sem nýlega var tekið til dóms, svo kannski fer að gefast tími.

Bara frá áramótum hafa verið bornar í umboðslausa stríðsherrann í Kænugarði, -ekki bara hundruð íslenskra milljóna, heldur þúsundir, -til viðbótar við fjárútlát dúkkulísanna frá fyrri árum. Á meðan blæðir þjóðveginum sem aldrei fyrr, er gott sem ónýtur eftir farið var að smyrja holurnar að innan með matarolíu, og þær kallaðar innviðir að hætti dýralæknanna.

Hvaða farið hefur úrskeiðis á milli eyrnanna á sprengjudúkkum, -æðandi með ríkissjóð á wokesterum til Evrópu, er ekki fyrir meðalgreindan mann að átta sig á. Enda efast ég um að þó reynt yrði að fá skýringar Kúlulánadrottningarinnar og Lukkupottsins að þær skildu þær sjálfar. Á meðan sitjum við, sem enn búum í Barbaríinu, og horfum dofin á.

Íslendingar virðast helst vilja láta erlent vald frelsa þá frá sjálfstæðinu og krónunni í kassanum, -landinn búinn að steingleyma að hvorki gekk né rak að komast út úr moldarkofunum með þeirri Dönsku eða Skandinavíska ríkisdalnum á öldum áður. Enda eru flestir núorðið með höfuðið á sama stað og strúturinn við að telja tær í sandinum á Tene.

Það var ekki fyrr en krónan tók við, og moldarkofarnir voru að hruni komnir, að eitthvað fór að rofa til upp úr 1919, -og þá með þeirri íslensku. Spurning hvort Lukkupotturinn og Valkyrjurnar, ættu ekki allavega í það minnsta, að taka eins og eitt Trump á fraukuna Fredriksen áður en anað er í ESB.

Þangað leitar klárinn sem hann er kvaldastur, -var vel þekkt orðatiltæki á hátindi feðraveldisins. Nú virðist fraukurnar í forynjuveldi ESB endanlega hafa tapað áttum og kasta stríðsæsingum á báða bóga við fögnuð Valkyrjanna. Á meðan semja þeir Selinskí, Pútín og Trump, -The Art of the Deal.

Athugasemdir

[Jóhann Elíasson, 27.2.2025 kl. 12:59]

Frábær pistill, sem ætti að vekja okkur Íslendinga til meðvitundar um það hvernig við "látum" sprengjudúkkur fara með okkur.......

[Magnús Sigurðsson, 27.2.2025 kl. 15:37]

Takk fyrir athugasemdina Jóhann, -hvað sem framsetningu pistilsins varðar þá er innihaldið vonandi rétt rakið.

[Helga Kristjánsdóttir, 28.2.2025 kl. 16:37]

Já Jóhann afbragðs! Rétt þegar ég er komin á skrið með lesturinn, lendi ég í að segja stúlkum til verka,eins og hverjum öðrum hjúum,kann því ekki allskosta vel en verð vegna fötlunar.Mgnús þú leikur þér að skapa þennan létta gálgahúmor,eða er það ekki réttnefni.Takk fyrir.  

[Magnús Sigurðsson, 28.2.2025 kl. 18:59]

Takk fyrir athugasemdina Helga, -svona pistill er auðvitað inn við beinið allt annað en fyndinn. 

En ef það á á einhvern hátt að bendla svona skrif við húmor þá er auðvitað rétt kenna þau við gálga.

Nei það er sorglegt að sjá hvernig þau sem starfa í okkar umboði umgangast frið og kærleika á jörðu.

-Og af því að ég var mikill mömmudrengur, -vissi enga réttsýnni, og veit enga nú í dag betri en hana Matthildi mína.

-Þá kemur það mér mjög á óvart að konur skuli ganga fram undir svona ráðslagi, -eins og mátt hefur sjá hjá Dúkkulísunum og Valkyrjunum.

Að það nú skuli vera þrír karlmenn, sem þekktir eru fyrir allt annað en vönduð meðul þegar sakleysingjar eru annarsvegar, -geti nú baðað sig í sviðsljósinu við að koma á frið í heiminum.