Í leit að ljósi

Rjúkandi ryk

drunga drunur

-augu opnast

engin drauma niður

því þakið logar

og húsið hrynur

 

 

Í rústum og ryki

fimir fætur þjóta

meðan veröldina

sprengur brjóta

 

 

Í dauðans dansi

og óráðs asa

í myrkri litlir fingur

eftir dyrum fálma

 

 

Með angist í augum

og vonar bæn á vörum

um veggjabrotin hrasa

– börnin á Gaza

Athugasemdir

[Guðjón E. Hreinberg, 19.3.2025 kl. 07:27]

Guðlaun.

kv.

[Ómar Geirsson, 19.3.2025 kl. 08:53]

Góðan daginn Magnús.

Mig langar bara að segja þér að Hérarnir eiga Skáld, þó það sé frá Djúpavogi komið.

Skrýtinn heimur sem við lifum í, en hann hefur kannski alltaf verið svona.

Allavega, kveðja úr sólarylnum í neðra.

[Magnús Sigurðsson, 19.3.2025 kl. 15:26]

Takk fyrir innlitið og athugasemdirnar félagar, -það er gott að vita þegar manni tekst að kveða sameiginlegan tóm. Já skrýtinn er heimurinn þessa dagana og hefur kannski alltaf verið.

Ég er reyndar að mestu Austfirsk Norðurlandsblanda svo því sé til haga haldið. Leið Lögheimilanna lá úr Reykjavík á Hérað, eftir námsárin mín á Neskaupstað þangað og þaðan á Djúpavog sem manndómsárin vissulega komu til.

-Þaðan til Reykjavíkur á nýrri öld og aftur til baka á Hérað og um tíma til Harstad í Noregi. Svona ef Lögheimilin segja eitthvað til um hver maður er, -sem ég reyndar tel yfirleitt allt annað mál.

En hvað sem við verðum verum áfram börn barnanna vegna.

Bestu kveðjur úr efra, -Guðlaun fyrir sólina.

[Pétur Örn Björnsson (IP-tala skráð) 21.3.2025 kl. 11:39]

Takk fyrir ljóðið, meistari.