Draumur - Brísingamen Freyju

Þennan staf skal rista á surtarbrand með háfshorni þá tungl er þriggja nátta, og láta undir höfuð þitt. Og mun þig þá dreyma það þú vilt.

 

Jón í Vogum átti bæði draummann og draumkonu og dreymdi því oft merkisdrauma. Draumkonan gaf honum ýmis heilræði í svefninum ásamt því að vísa honum á það sem hann hafði glatað eða misst á einhvern hátt.

Meira um draumspeki Jóns í Vogum má lesa í Þjóðsögum Jóns Árnasonar. En hver var þessi Skuggi sem gaf út Galdraskræðuna sem ótæpilega hefur verið vitnað til í nokkrum undanförnum bloggum?

Skuggi hét Jochum Magnús Eggertsson, var bróðursonur Matthíasar Jochumssonar. Hann var meðal margs; -skáld, rithöfundur og mjólkurfræðingur. Frægastur er hann sennilega fyrir Brísingamen Freyju, en það setur hann fram kenningar um Krýsa sem bjuggu á suðvestanverðu landinu og höfðu Krýsuvík sem höfuðstað þegar norrænir menn hófu sitt landnám á Íslandi.

Jochum vildi meina að margir íbúar þessarar jarðar lifðu undir örlögum Egypskra skugga. Og við, þessi fámenna þjóð á Íslandi, ættum okkar fornbókmenntir Krýsum að þakka, gullmunnunum sem gáfu okkur tunguna, -guðamálið. Ortu Edduljóðin, Völuspá og Hávamál. 

Í stuttu máli lá leið Krýsa með menningararfinn frá Iona í Gríska Eyjahafinu til eyjarinnar Iona á við Skotland, sem tók nafn sitt þá af eyjunni Grísku, -og þaðan til Krýsuvíkur, -nokkru áður en landnám norrænna manna hófst á Íslandi.

Kolskeggur Iberíasson var menningarviti í Krýsuvík upp úr árinu 1000 og Jón Kjarvalsson þá á Vífilstöðum. Þeir skráðu fyrstir Íslendingasögur á latneskt letur. Jón Kjarvalsson samdi Völuspá og Kokskeggur Hávamál.

Leiðtogar Krýsa voru upp úr siðaskiptunum ofsóttir og drepnir. Kolskeggur var veginn á flótta árið 1054 þar sem nú heitir Kapelluhraun. Reist var Kapella á þeim stað sem fór undir hraun. Kolskeggur fékk svo nafnið Kölski á íslensku,

Krýsar voru miklir athafnamenn, áttu skip sem sigldu til Grænlands og Vínlands, suður til Miðjarðarhafslanda og allt til Nílarósa. Þeir fluttu út íslensk og vesturheims verðmæti, svo sem skinn, rostungs- og náhvalatennur. Innflutningurinn var einnig margvíslegur, má þar nefna úlfvalda.

Gengu stórar úlfvaldalestir undir klyfjum að og frá aðalbækistöð Krýsa, -Gömlu-Krýsuvík, við skreiðarflutninga. Krýsar höfðu eingöngu tveggja kryppuúlfvalda og voru þeir kallaðir “drógir” eða “draugar”, sem var íslenskun á “drómetar”, og er þaðan orðið draugur komið í íslenska tungu.

Nú kann einhver að spyrja hvort Skugga hafi dreymt þetta, -eða kunnað þann galdur að ferðast um tímann.

 

Heimildir:

Galdraskræða

Þjóðsögur Jóns Árnasonar

Brísingamen Freyju

Athugasemdir

[Guðjón E. Hreinberg, 13.4.2025 kl. 12:21]

Þess má geta, að fyrir mörgum árum vélritaði minn, Brísingamen Freyju, og setti upp í upprunabroti, á Vefinn.

http://hreinberg.is/?p=1277

Bestu kveðjur

-- og því þurfumvið að sprengja alla Píramída í tætlur, hvar sem þeir finnast ofanjarðar og neðansjávar.

[Magnús Sigurðsson, 13.4.2025 kl. 16:23]

 Takk fyrir tengilinn á Brísingamenið, Guðjón, -það ættu sem flestir að lesa þá bókmennt.

Sprengja alla Píramída segirðu, -þá verður lítið eftir á jörðinni annað en tætlurnar og gufan.

Bestu kveðjur.

Ps.  - Varðandi efni þessa pistils þá er tilvitnunina í Brísingamenið að finna í V kapítula, ef einhverjir hafa áhuga.

http://hreinberg.is/?p=1277

[Ingólfur Sigurðsson, 13.4.2025 kl. 18:08]

Þessi Krýsakenning Skugga er talinn skáldskapur af flestum fræðimönnum. Ég tel að hann hafi haft samband við samhliða jörð þar sem þróunarbrautirnar urðu aðrar. 

Það er skrýtið að Skuggi, Baháatrúar, sem hann var skuli hafa trúað á þennan ofurmátt egypzkra fræða, því Baháar eru í grunninn kristnir og gyðinglegir menn, þeir bæta við spámönnum, Bábinum og Baháa, en mótmæla ekki gyðinglegri eða kristilegri hefð, og jafnvel ekki múslímskri hefð eða trú. Þeir eru friðarins menn og hef ég kynnzt þeim sumum.

Ásgeir Blöndal hunzar algjörlega Skuggafræðin, og nýölsku fræðin líka, en dr. Helgi kom með áhugaverðar orðsifjar einnig.

Ég get sagt að útilokað er með öllu að norrænar bókmenntir séu ekki frá norrænum mönnum komnar. Búið er að rökstyðja það svo rækilega af fræðimönnum.

Hitt er annað mál að keltnesk menning er skyld hinni norrænu, allt kemur þetta frá indó-evrópsku frummenningunni, sem er miklu eldri en sú gyðinglega, og trúin á Jahve.

Indó-evrópska frummenningin er um 8000 ára gömul eða meira, sumir halda því fram. Hvort sem hún kom frá Tyrklandi eða Kákasus, þá eru þar goðsagnirnar sem endurspeglast í Biblíunni, í útþynntri og umbreyttri mynd.

Jahve-menningin er varla meira en 4000 ára gömul.

Sköpunarsagan sjálf í Biblíunni er afmynduð og afskræmd NORRÆN og GERMÖNSK sköpunarsaga.

Kenningar Skugga er auðvelt að útskýra. Kristnir menn verða ruglaðir þegar þeir nálgast heiðin fræði. Jahve er djöfullinn sjálfur, og snýr öllu á hvolf, hann er faðir lyginnar, Loki Laufeyjarson.

Þar af leiðandi, aldrei að treysta neinu sem kristnir menn segja, Skuggi þar með.

Dr. Helgi Pjeturss hélt því fram að sumar skynjanir og sýnir ættu sér uppruna á öðrum hnöttum.

Hann hélt því fram að sagan um Atlantis væri þannig. Sögurnar hans Skugga eru greinilega þannig, veruleiki frá hliðstæðum alheimi, af kurteisi segi ég ekki klikkun, sem flestir halda.

[Ingólfur Sigurðsson, 13.4.2025 kl. 18:16]

Ég gleymdi að bæta því við sem skiptir miklu máli í þessu sambandi. Ég hef horft á myndbönd bara frá þessu ári þar sem húðflúraður gaur og mjög snjall fræðimaður, sem afkristnaðist, heldur því fram að Jahve, guð Biblíunnar, sé í raun Bakkus eða Díónysus, eða Hefestus, bæklaði smiðurinn og guð elds og járnsmíða. Það gæti útskýrt ofbeldishneigð Jahves og reiði, að hann hafi verið ofsóttur meðal guðanna og sé úrhrak.

Einnig eru mörg Youtube myndbönd þar sem haldið er fram að hvorki Jahve sé til né Jesús Kristur. Að Rómverjar hafi fundið upp Jesúm Krist og að gyðinglegir rabbínar hafi fundið upp Jahve til að treysta eigin völd, eftir hrakninga og eyðingu musterisins. 

Þetta tímasetja og rökstyðja fræðimenn á Youtube, sjálfstæðir eða frá háskólum.

Ef við trúum þessu, að kristnin og gyðingdómurinn sé allt mannasetningar og skáldskapur til að ræna völdum, að engir vættir séu á bakvið, þá er auðvelt að skilja helstefnu síðustu alda, eyðileggingu vestrænnar menningar og norrænnar.

[Magnús Sigurðsson, 13.4.2025 kl. 19:47]

Takk fyrir Ingólfur, -þó jaðri við þvergirðing, þegar þú segir: - Ég get sagt að útilokað er með öllu að norrænar bókmenntir séu ekki frá norrænum mönnum komnar. Búið er að rökstyðja það svo rækilega af fræðimönnum.

Þá vil ég segja; -fræðin og vísindin eru á pari við trúarbrögðin, ná svo langt sem þau ná og skipta upp í lið líkt og íþróttirnar, -eiga þar að auki við á sínum tíma.

Stundum er talað um pardigm shift á ensku, þ.e. þegar trúin virðir ekki lengur brögðin, -viðtekin hugmyndafræði hverfur, -hugurinn hættir að lúta fræðunum.

Þess vegna endaði pistillinn á spurningunni hvort þetta hefði verið draumur Skugga, eða hvort hann kynni galdurinn að ferðast um tímann.

Bestu kveðjur.

Ps. -svona þér að segja hafði einu sinni samband við mig kona menntuð fræðum, vegna pistlasyrpu sem ég setti á bloggið, -við hana spunnust líflegar athugasemdir.

Konan vildi vita hvort ég gæti komið þeim saman sem settu inn athugasemdir því hún hefði áhuga á að koma á fræðaráðstefnu um óhefðbundnar söguskoðanir.

En hún vildi fyrst vita hvar ég hefði fengið lykla til að ferðast söguna aftur í tímann og bað mig um að senda sér tengla.

Ég sendi henni nokkra óhefðbundna hugvekjara, -þar á meðal Skugga. Hún svarði um hæl með fússi, og sagði að trúarnöttara á við Skugga hefði hún engan áhuga að lesa.

Ég heyrði ekkert frekar frá henni, enda nákvæmlega sama, hefði ekki nennt að reyna að smala þeim saman sem gefa mér góðar athugasemdir við blogg til að einhver gæti upphafið sig sjálfa.

Það þarf kannski ekki að koma á óvart að ekkert varð úr rástefnu konunnar  því hún var skömmu seinna kjörin á alþingi.

[Guðni Björgólfsson, 13.4.2025 kl. 21:58]

Sæll Magnús.  

Forvitnilegt hefði verið og ekki síst nú á föstunni

að vita hvort Hallgrímur Pétursson hafi verið húðflúraður.

[Guðjón E. Hreinberg, 13.4.2025 kl. 22:34]

Ég átti "Skammir" eftir Skugga, og var byrjaður að uprita hana á sínum tíma, en síðan glataði ég eintakinu - en þar fer hann dýpra ofan í sum af Krýsafræðum sínum og rekur söguna af þegar hann fann Gullinskinnu.

[Ingólfur Sigurðsson, 13.4.2025 kl. 23:47]

Guðjón,

Ég kannast við þetta um tímaflakk og fyrirgefninguna, þetta er rétt hjá þér, en fleira væri hægt að bæta við. Látum það nægja að sinni.

En Magnús,

kannski var ég of þvergirðingslegur, en það er hann Guðmundur Örn líka og margir aðrir sannkristnir.

En ef búið er að taka trúarbrögð og menningu af norrænum mönnum og eigna öðrum, hvað voru þeir þá? Villimenn og skrælingjar? Ómenntaðir fávitar? Nei, það er ljótt að halda slíku fram um forfeður okkar og ekki trúverðugt.

Er það ekki rökrétt að menning heiðinna fornmanna hafi verið merkileg og full af þversögnum og leyndardómum eins og bókmenntirnar okkar í Eddum og Íslendingasögnum gefa til kynna? Keltar eiga sínar bókmenntir sem voru varðveittar af Írum. Það ætti að nægja þeim.

Miðilsstarf þekki ég vel bæði sjálfur og að hlusta á aðra, og það er eitt sem er alveg víst með svona andleg mál, ekkert er öruggt, ekkert er pottþétt. 

Gæti trúað að Skuggi hafi verið miðill sjálfur samkvæmt þessum ritum og kenningum hans. En það er þá eins og með Nostradamus og fleiri - flestir taka ekkert mark á slíku. Þetta er á andlegu þokusvæði og vísbendingar eru þetta frekar en glerharðar sannanir. 

En það væri rangt af mér að þvertaka fyrir þetta. Vel má vera að ýmislegt bitastætt sé í þessu hjá Skugga, en þá væri betra að fornleifarannsóknir myndu styðja það.

Mér finnst gott að þú settir þetta á vefinn Guðjón, bókina hans Skugga. Ég hef ekki lesið þetta allt en skoðað samt og reynt að kynna mér. 

Þetta er bara allt svo framandi venjulegri söguskoðun og enginn viðurkenndur sagnfræðingur tekur undir þetta svo ég viti.

En allt um það. Við leyfum okkur að dusta rykið af ýmsu og pæla. Það er ágætt.

Beztu kveðjur.

[Magnús Sigurðsson, 14.4.2025 kl. 05:46]

Sæll Guðni, -það væri forvitnilegt að vita.

Ég hef reyndar aldrei rekist á að landsmenn þessa tíma hafi verið húðflúraðir með öðru en þá brennimerki.

Það er sagt að Hallgrímur Pétursson hafi þjáðst af holdsveiki undir það síðasta, en það eru væntanlega ekki þannig flúr sem þú átt við, -holdsveiki eða brennimerki.

[Magnús Sigurðsson, 14.4.2025 kl. 05:52]

Þakka þér heilræðið Guðjón, -sturta því þó svo Ingólfur dreypi á.

Ég hef ekki rekist á "Skammir" Skugga og ekki heldur Gullbringu, mér skilst að hann hafi aldrei viljað sýna þær fornminjar og kannski þess vegna er hann vefengdur í bak og fyrir.

[Magnús Sigurðsson, 14.4.2025 kl. 06:02]

Þakka þér athugasemdina Ingólfur, -hún gefur í skin bót og betrun.

Ég hef sjaldan látið skipa mér í lið og er ekki í neinu sérstöku Skugga liði svo því sé haldið til haga, -þó svo að ég hafi gaman að vitna til fræða hans í sambandi við galdur. -Hann gaf jú út Galdraskræðu.

Ef þú tekur þessum pistli mínum sem einhverri lítilsvirðingu til okkar fornmenningar þá veður þú villu og svima.