Maríuerlan mætt - Lítið til fugla himinsins

Það er getur verið snúið fyrir okkur mannskepnurnar að sjá að við stöndum málleysingunum langt að baki í því að skynja orku náttúru og umhverfis. Lítil fluga sem vaknar að vori er jafnvel okkur mannfólkinu fremri þegar þar að kemur. Þessu veldur hinn heilagi hagvöxtur sem enginn skilur lengur frekar en stöðugleika stríðsæstra stjórnvalda.

Já það hefur verið að læðast að vorið. Maríuerlan fyrir nokkru mætt frá V-Afríku á svalirnar mínar, komin í múslíið eftir að flugurnar lögðust aftur í dvala páskahretsins sem mætti samviskulega á pálmasunnudag. Heiðloftin höfðu fært Héraðinu 17 stiga hita og farfugla dögum saman. Þá datt niður tuga sentímetra snjór sem ekki hefur vikið í meira en viku.

Snjórinn fær samt ekki þrifist til lengdar úr þessu frekar en hagvöxturinn, -nema þá á neytendunum. Þess vegna er snjór varla til í hagtölum frekar en fólk, nema hann komi úr snjóframleiðslu vélum skíðasvæðanna.

Til að búa til hagvaxna neytendur er aftur á móti miklu til kostað, við að nýta ekki orkuna sem dags daglega er í kringum okkur, þess í stað er níðst á svokölluðum orkuauðlindum til að koma þeim í tæki og eyðilögð um leið eftirvænting mannfólksins og orka jarðar.

Það fær ekki nokkur manneskja, sem inn í þennan heim kemur, -að vera lengur með sjálfri sér nema rétt á meðan hún er ómálga brjóstmylkingur og svo aftur þegar hún er komin þar sem kallað er út úr heiminum fyrir aldurs sakir.

Um leið og barnið lærir einföldustu orð á við mamma, þá er barnið sett í hagvaxtar hakkavélina því það skal ekki nokkur manneskja fá að fæðast inn í þennan heim án þess að borga fyrir það, ekki bara með lífinu, -heldur skal hún vera upptekin við að trekkja áfram hagvöxtinn frá vöggu til grafar.

það kæmi ekki nokkrum farfugli til hugar að hafa greiðslukort á sér til að greiða fyrir það að vera til, ímyndaðu þér ef maríuerlurnar færðu ekki ófleygum ungungum flugu í hreiðrið nema á milli kl 12-13 á meðan þeir væru í þjálfun við að grafa holu fyrir hagvöxtinn áður en flogið er úr hreiðrinu.

Já við mannfólkið virðumst standa fuglum himins langt að baki þegar kemur að því að nýta okkur orku umhverfisins og uppeldi unganna okkur til yndisauka. Þó svo að maður geti hagvaxtarins vegna gaukað nokkrum múslí fræjum að maríuerlunni á þessum síðustu og verstu eftir langferð hennar frá Afríku.

Athugasemdir

[Guðjón E. Hreinberg, 21.4.2025 kl. 13:20]

... og að endingu gæti erindi af þessu tagi, orðið ólöglegt.

Páskakveðjur.

[Magnús Sigurðsson, 21.4.2025 kl. 16:28]

Þú segir nokkuð Guðjón, -stærri spámenn hafa verið meira en bannaðir fyrir að segja sannleika á einfaldri hátt.

Þú sagðir það. En ég segi yður: Upp frá þessu munuð þér sjá Mannssoninn sitja til hægri handar máttarins og koma á skýjum himins. -Við vitum hvernig fór.

En munum; Lítið til fugla himinsins. Hvorki sá þeir né uppskera né safna í hlöður og faðir yðar himneskur fæðir þá. Eruð þér ekki miklu fremri þeim?

Takk fyrir páskakveðjurnar.

Bestu pákakveðjur til þín.

[Ingólfur Sigurðsson, 21.4.2025 kl. 18:00]

Dásamleg þessi erindi Magnúsar sem eru á mörkum trúarbragða og siða og full af heiðríkju náttúrunnar og vorsins.

En ég sendi ykkur báðum góðar páskakveðjur í gær í samræðuþræði Guðjóns frá föstudeginum langa. Auk þess tók ég málstað Magnúsar þar sem hann sagði að kærleikurinn einn skipti máli. Ég sagðist ekki skilja að svo mikill heimsspekingur sem Guðjón væri að efast um kærleikann.

Eitt í viðbót: Heiðna umfjöllunin mín í dag er líka að fjalla um tengsl manns og náttúru.

Auk þess saknaði ég hróss frá Magnúsi á páskadag þegar ég fjallaði um ömmu og afa. En ég þakka hrós um aðra slíka pistla.

Og endurtek, sendi ykkur páskakveðjur góðu félegar.

[Magnús Sigurðsson, 21.4.2025 kl. 19:09]

Þakka þér fyrir Ingólfur, -á mörkunum segirðu, mér finnst þetta með fugla himinsins vera sannleikurinn og lífið, svo framarlega sem því er ekki tekið línulega án spíralsins.

Ég les pistlana þína og svo var með þennan í morgunn. Hann rifjaði upp fyrir mér fyrri tilvitnunina sem ég setti inn við athugasemd Guðjóns. Svarið sem æðsti prestur musterisins fékk um konungdóminn - sólarupprásina og morgunnroðann. Fannst þú koma vel inn á þau sannindi með þínu lagi, -sama hvað kemur dagur eftir  þennan dag.

Æskupáskaminningarnar las ég líka og líkaði vel eins og alltaf þegar þú segir æskuminningar. Þú sagðir frá því að mamma þín hefði munað eitt páskaegg í sinni æsku. Þannig var það einnig í minni bernsku og æsku, hygg að svo hafi víða verið fram yfir 1970.

Eitt árið var ekkert pákaegg, einhvertíma á árunum 65-69, þá voru þau uppseld. Eins varð síldarhrun á þeim árum.

Pabbi hafði þá atvinnu við síldina. Foreldrarnir reyndu samt að búa til páskaegg handa okkur krökkunum úr Síríus súkkulaði og Kóngabrjóstsykri, en gleymdu málshættinum, það er sennilega eftirminnilegasta páskaegg berskunnar.

Stundum finnst mér vissara að sleppa því að setja athugasemdir við pistla á blogginu, ekki vegna þess að þeir séu ekki hugvekjandi, heldur vegna þess að þeir höfða til mín og ég veit ekki hvort athugasemd frá mér yrði vel þegin.

Sama er hvað varðar bloggin ég er yfirleitt í vafa hvort maður á að birta þau, þau gætu allt eins misskilist.

Reynsluheimur fólks er mismunandi og ég hef engan áhuga á að móðga fólk. Þess vegna eru það í raun athugasemdirnar sem gera bloggin mín.

Bestu páskakveðjur til þín.