app Mafía a, la ISAVIA

Þegar hið opinbera hlutafélag ISAVIA reið á vaðið með að rukka fólk eftir myndum varð fjandinn laus, hver app Mafían af annarri hefur tekið upp á því að mynda fólk þar sem það stoppar við þjóðveginn og rukka það feitt.

Þessi ósköp má skrifa á ógæfufólkið við Austurvöll enda fékk ISAVIA reglugerðabreytingu úr ráðuneyti til að fá að rukka fólk fyrir að stoppa í landi ríkisins. Bílaplön sem hafa verið fjármögnuð af skatttekjum. Allt undir formerkjum bættrar upplifunar.

Bæjarfélög hafa síðan siglt í kjölfarið og hafið þann aumkunarverða vesaldóm að rukka ferðalanga sem álpast til að stoppa innan þeirra marka, -eru sum að verða sannkallaðir Kardímómubæir. Svo sjá svokallaðir landeigendur nú gull á hverju strái við þjóðveginn.

En það má að hluta skrifa þetta allt saman á okkur sjálf, -að því leiti að við samþykkjum að hver sem er geti rukkað eftir mynd, -svo einkennilegt sem það nú er. Sennilega gerum við það þægindanna vegna, eða höldum að við njótum þess í verði að innheimtan sé framkvæmd á sem auðveldastan hátt, -og það vegna gjalda sem voru ekki til fyrir skemmstu á eigum almennings.

Öllu hefur verið snúið á hvolf, það ætti í raun að vera skilda að hafa einhvern til staðar til að taka við greiðslu allstaðar þar sem hennar er krafist, ekki bara í búðum. Snjalltækni við greiðslumiðlun ætti þar að auki að vera valkvæð, -fyrir þá sem ekki vilja feisa afgreiðslumann eða losna við að standa í biðröð.

Þá myndu þessar app mafíur í það minnsta drullast til að hafa mann á staðnum þó ekki væri nema til að gera fólki grein fyrir því hvernig á að borga. En auðvitað verða ekki sett nein vitræn lög í þá veru af ógæfufólkinu við Austurvöll, það lið hefur sýnt sitt rétta andlit.

Það sorglega er, að það eru mest Íslendingar í eigin landi sem verða fyrir barðinu á þessum óskapnaði, flestir erlendir ferðamenn eru búnir að sjá við íslensku app mafíunum.

„Er mjög undrandi á því sem er að gerast“

Athugasemdir

[Ingólfur Sigurðsson, 17.8.2025 kl. 23:00]

Það er ömurlegt hvernig tæknin er notuð til að leggja fólk í einelti og gera því lífið óbærilegra. Það var einmitt sagt þegar gervigreindin var að ryðja sér til rúms að annaðhvort yrði þetta til að bæta fólki lífið eða að auðrónastéttin myndi nota þetta til að auka völd sín. Ég bjóst við hinu síðarnefnda sem gekk eftir. Ég er talinn gamaldags fyrir að hvetja fólk til að berjast gegn nútímanum. En oft var þörf en nú er nauðsyn. Maður þarf að vera svo heimskur til að sjá ekki hvernig fólk er kúgað með þessu að allir ættu að sjá þetta og skilja. 

Einokunarhringir erlendir og fáeinir eru með næstum alla matvörusölu hjá sér. Einokunin veldur því að okrað er á fólki. Sumir segja að fíkniefni séu í neyzluvörum, til að fólk kaupi meira. Allavega er eitt ljóst, og það er að gróðafíknin ræður.

Ef við Íslendingar myndum lifa á okkar eigin landbúnaði og fiski, kannski yrði hér ódýrara að lifa. Það vantar svona hugmyndir og kjark í fólk.

Nútíminn minnir á geðveikan spíral sem endar í sprengingu.

Já trúgirnin hefur sjaldan verið meiri en núna við Austurvöll. Enda ungir leikmenn við völd. Búið að setja á eftirlaun þá með reynsluna.

[Magnús Sigurðsson, 18.8.2025 kl. 05:15]

Þakka þér fyrir skelegga athugasemd Ingólfur, -þú hefur séð þetta fyrir, við fáum ekki einu sinni umbun fyrir að afgreiða okkur sjálf í Bónus á sjálfafgreiðslukassa.

Já og þeir eru allar eins þessar snjallvæddu sjálfsafgreiðslur og þakka þér alveg sérstaklega fyrir að minnast á orðið samkeppni, það er langt síðan að það hefur heyrst.

Ef innlend matvælaframleiðsla væri ekki kæfð með reglugerðafasisma og ógæfufólkið við Austurvöll gerði sér grein fyrir hvenær verið er að hafa það að fífli, þá væri lítið mál að gera landið sjálfbært hvað matvæli varðar, -hvað þá ef fólk fengi að stunda þá samkeppni að selja sína framleiðslu sjálft.

En í stað þess eru fáviskufabrikkurnar fylltar af fólki sem streymir inn í regluverkið og á það til að enda sem ógæfufólk á alþingi með dýralæknismenntunina sína þar sem það slátrar bústofni landsins engum til gagns né góðs.

Bestu kveðjur og takk fyrir góða athugasemd.

[Guðjón E. Hreinberg, 18.8.2025 kl. 18:20]

Exodus, eða hótun á því, er eina leiðin, en því miður er svo erfitt að meitla letrið í grjótið.

Bestu kveðjur.

[Magnús Sigurðsson, 18.8.2025 kl. 21:17]

Ekki veit ég hvort er betra Guðjón, -en það er eins og fjöldin vilji hvorugt, og hafnar boðorðunum 10, -meitluðum í stein.

Mætti kannski kallast siðfall að nýju upphafi uppgjafarinnar. Flóttinn getur samt varla orðið úr þessu annað en inn á við.

Bestu kveðjur og takk fyrir íhugunarverða athugasemd.

[Magnús Sigurðsson, 18.8.2025 kl. 21:50]

Það sem app Mafían gerir best, er að hafa hið svokallaða vanskilagjald svo rausnarlegt að borð er fyrir báru til að senda stefnuvott í næturvinna heim að dyrum Íslendinga.

Á meðan erlendu túristarnir taka af sér "skapaðu minningar myndir" við staðinn Gjaldskyldu, enda þurfa þeir litlar áhyggjur að hafa af stefnuvottunum þegar heim er komið, og búnir að loka greiðslukortinu sem bílaleigubíllinn var tekinn út á.

[Magnús Sigurðsson, 19.8.2025 kl. 06:54]

Ef einhver lesandi skyldi vera í vafa hvaðan orðið gjaldskylda er komið, þá er það íslenskt, og höfðar eingöngu til Íslendinga rétt eins og bílastæðagjöldum er ætlað.