Skattleggja skuldir.

 

Það fer lítið fyrir raunhæfum aðgerðum til að ná endum saman í ríkisfjármálunum.  Mitt á milli umræðna um fjárlagafrumvarpið boðaði ríkisstjórnin breytingar á stjórnaráðinu sem fólu m.a. í sér að ráðherrar gætu ráðið fleiri aðstoðarmenn.  Þessu liði er þrátt fyrir gjaldþrot Íslands fyrirmunað að skera niður sjálft sig. 

Leiksýninguna á alþingi skipa 63 þingmenn á ofurlaunum sem hlaupa út og suður í vinsældaleit og mótmæla því að farið sé gegn almannahagsmunum.  Þrátt fyrir það verða keyrð í gegn fjárlög þar sem ekki er tekið á meini útblásinnar stjórnsýslu, á sama hátt og þjóðin situr uppi með glæpsamlegt bankakerfi auk IMF, ESB aðildarumsókn og icesave samninga, þvert gegn vilja hennar.  Til þessara vildarvina og gæluverkefna renna hundruð milljarða ár hvert í andstöðu við þjóðina.

Þó við viljum trúa því að ríkinu sé ætlað að gæta jafnræðis meðal þegnanna, þá er því ætlað að flokka þá og hafa að tekjulind.  Þetta er gert sífellt bíræfnari hátt.  Óendanlegar reglur hafa verið settar um hvernig samskipti fólks skulu vera.  Hvert viðvik, greiði eða velvild í samskiptum fólks skal verðleggja í gegnum vinnu og gefa upp til skatts. 

Innræting ríkisins er svo öflug að við trúum því að við fáum réttláta skiptingu gæðanna og við sjálf séum höfundar kerfisins.  Jafnvel eftir hrun þar sem ríkisvaldið stendur strípað, líkt og keisarinn forðum, er ætlast til að afrakstur vinnu okkar renni í formi skatta til glæpamanna sem brutu öll siðferðisviðmið.  Staðan er orðin þannig að almenningi er gert að taka lán, til að borga sér laun til að geta borgað skatta.

Útgjöld hækka um 9 milljarða

Athugasemdir

[Ólafur Ingi Hrólfsson, 15.12.2010 kl. 10:44]

Þú ert að misskilja hugmyndafræði stjórnarinnar -

ástæðan fyrir skattlagningu skulda eins og þú kallar það er jafnframt skattlagning samskipta fólks - ef þú t.d. hjálpar mér við að moka bílinn minn út úr skafli - eða ýtir honum - þá er það vinna sem ber að skattleggja - þú greiðir öll eðlileg gjöld og ég greið gjafaskatt. Hlunnindagjald o.fl.

Vona ég að þessi skýring dugi til. Auk þess þjappar það þjóðinni saman að hirða allt af henni og samstaða er jú það sem alltaf er verið að tala um - ekki satt?

[Magnús Sigurðsson, 15.12.2010 kl. 12:45]

Ólafur;  sammála þér.  Þetta er nokkurnveginn það sem ég er að reyna að segja.  Það sem þú gleymir að taka inn í reikninginn er að ég keypti skófluna á láni sem hefur stökkbreittst, vegna þess að stjórnvöld hafa ákveðið að ég  borgi glæpamönnum skófluna oft, þess vegna segi ég að þeir skattleggi skuldir.

þetta ætla þeir þjóðinni að gera í gegnum ríkissjóð, þar með erum við farin að taka lán til að hafa laun til að borga skatta.

En annars ef þú festir þig þá skal ég moka þig upp frítt, ekki málið.