Er verið að framleiða rándýrt myrkur með rafmagni?

Það gerðist hérna á 69°N í haust að ekki var lengur hægt að taka veðrið með því að líta til himins þegar það fór að verða dimmt á morgnanna.  Kiwi butik var mætt á svæðið í gamla postterminalinn sem hafði staðið auður á bak við hús.  Frá glugganum á bakhliðinni hafði ég getað tekið veðrið að morgni í hvaða birtustigi sem var og getað virt fyrir mér Gangsástoppinn á stjörnubjörtum kvöldum.  Þó svo að það sé byggð hátt upp í hlíðar toppsins eru götulýsingarnar þessar gömlu bláu sem gefa daufa birtu niður fyrir staurana, sem standa inn á milli trjána til að halda uppi gömlu loftlínunni.  En nú er semsagt nútíminn tekin við á bak við hús, rétt eins og fyrir framan það þar sem helst umferðaræð Harstad liggur að stærsta verslunarmiðstöðinni, Kanebogen Center.

Auk lýsinga Kiwi, sem voru upplýstir útveggir allt um kring þannig að þjófar geta hvergi farið huldu höfði, háir og miklir ljósataurar við bílastæðin, ljósamastur með flóðlýsingu sem finna má á íþróttavöllum, já og auk þess var búið að raflýsa aðal umferðaæðina að Kiwi, sem liggur á milli mín og Gangsástoppsins á nútímalegan máta.  Að vísu var flóðljósamastrið fljótlega fjarlægt enda lýsti það upp allt heila hverfið þannig að ef ekki voru brúkaðar myrkvunargardínur var bjart sem að degi innanhúss og skugginn af manni sjáfum upp um alla veggi.  Sennilega hefur einhverjum dottið það sama í hug og mér að Kiwi gæti verið með annað mastur í undirbúningi þar sem komið yrði fyrir hátölurum sem flytti auglýsingar á 180 desbilum fyrir jólin og því væri vissara að leggja inn kvörtun strax svo ekki kæmist hefð á möstrin. Það er semsagt ekkert nema ofbirtan niður á tómu bílaplani sem blasir við út um gluggann minn þegar ég ætlaði að líta til veðurs á skammdegismorgnum.     

En til hvers er verið að raflýsa svona rækilega að ekki sjáist til himins heldur aðeins hvítmáluð strikin á bílaplaninu?  Jú einmitt til þess að fólk sjái niður fyrir tærnar á sér enda er það eina sem það þarf að sjá til að kunna fótum sínum forráð inn í Kiwi mat butik eða Kanebogen Center til þeirra í HM liðinu, Dressmann, Jack & Jones.  Á Wikipadia má sjá að raflýsing er birta sem framleidd er með flæði rafstraums. Þetta er algengasta form gervibirtu og er mikilvægt nútíma samfélagi, sem innri lýsingu fyrir byggingar og úti ljós að nóttu,,, meira..

Þegar ég fór að finna út hvernig ég gæti séð til veðurs, hvað varðar annan klæðnað en skótauið áður en haldið væri út í dimman morguninn, datt mér í hug að best væri að kanna veðrið fyrir utan gluggann á internetinu.  Af því að einmanaleiki næturinnar hefur orðið til þess að morgni ég hugsa heim til mín, þá fór ég fljótlega að venja mig á að kíkja á veðrið á Íslandi í leiðinni.  Á www.yr.no eru nokkrar vefmyndavélar sýndar sem standa næst þeim stað sem er skoðaður.  Þann 28. nóvember s.l. var vefmyndavélin í ólagi á Egilsstöðum.  En mynirnar hér að neðan sýna hvernig var umhorfs klukkan tæplega fimm að morgni í rækilega raflýstum Seyðisfirðinum annarsvegar, og svo steinsnar frá, á óraflýstri Fjarðarheiðinni hinsvegar. 

Á sama hátt og linsuop vefmyndavélanna virkar mannsaugað, er nema von að maður spyrji; er verið að framleiða rándýrt myrkur með rafmagni?