Síðasta sumarið í sæluríkinu

Það hefur sjálfsagt farið fram hjá fáum, sem líta reglulega hér inn, að á þessari síðu lætur steypukall móðan mása og telur sig eiga því láni að fagna að hafa ekki lent í lokaritgerðinni.

Kannski finnst ekki öllum þeir vera fæddir undir þeirri heillastjörnu að staður og stund tilheyri þeirra hjartans þrá og þurfa því á öllu sínu sumarfríi að halda.

Það á samt ekki við þegar ævistarfið verður til út frá leikjum bernskunnar þar sem kofasmíði breyttist í launaða vinnu við varanleg minnismerki í formi húsa.

Síðuhöfundur hefur verið í algjöru sumarfríi og hafa pistlarnir undanfarnar vikur borið þess merki og þessa dagana er gamli sorrý Cherokee þar að auki haltur.

Til að ljúka sumarleyfis hjali þetta árið þá ætla ég að setja hér fyrir neðan video frá síðasta sumrinu í sæluríkinu, þar sem frístundunum var varið á Harstad Camping.

Í dag eru akkúrat sjö ár síðan, þeir sem vilja söguna geta lesið hér.

 

Athugasemdir

[Jóhann Elíasson, 3.8.2020 kl. 09:21]

Þú klikkar ekki frekar en fyrri daginn.  Alltaf gott að koma hér inn....

[Magnús Sigurðsson, 3.8.2020 kl. 14:10]

Þakka þér fyrir innlitið og athugasemdina Jóhann.

Þó svo að ég viti lítið um hverjir líta hér inn og lesa síðuna, þá þykir mér vænt um heimsóknirnar.

Þess vegna á ég það til í andleysi að setja inn gamalt grobb, frekar en ekki neitt, þegar mig grunar að það sé dagur gúrkunnar á blogginu.

Með kveðju af Héraði.

[Halldór Egill Guðnason, 3.8.2020 kl. 21:40]

 Tek undir með Jóhanni hér að ofan. Alltaf gaman að kíkja á karlinn, þó maður sé ef til vill ekkert að kommenta neitt að ráði. 

 Lokaritgerðina látum við öðrum eftir og njótum lífsins meðan gefst. Eigðu gleðilega sumarrest og vonadi læknast sjérókíinn af heltinu;-)

 Góðar stundir, með kveðju að sunnan.

[Magnús Sigurðsson, 4.8.2020 kl. 07:30]

Takk fyrir innlitið og athugasemdina Halldór.

Þú segir "njótum lífsins meðan það gefst", það er nú einmitt allt heila málið. Lífsgæði ættu alltaf að tróna á toppnum, þó svo að lokaritgerðin segja það vera lífslengd, sem að sjálfsögðu fer samt oft saman.

Cerokee er frá því á síðustu öld og vonandi er ameríski draumurinn ekki alveg á enda. Það yrðu nú ljótu fráhvarfseinkennin eftir alla áratugina akandi um í fjaðrasófum grænum.

Bestu afla kveðjur suður í kóvið á hinu hvelinu.