Ótroðin slóð

Þó ég hafi tapað fleiri orrustum í gegnum tíðina en tölu verður á komið þá hef ég ekki enn tapað stríðinu stóra. Þó að stríðsreksturinn hafi kostað að ég sé kominn það langt upp í afdalinn að síðasti bærinn sé horfinn og einungis sjáist í heiðið blátt, -þá trúi ég á sigur.

Í heiðríkju barnsálarinnar veit ég að tveir plús tveir þurfi ekki að vera fjórir frekar en mér sýnist. Sú útkoma er samkomulag breyskra manna, rétt eins og verðtryggðir tíu, -óraunverulegri en alda sem rísa á grunnsævi áður en hún brotnar í grýttri fjöru.

Sigurinn er og verður meistarans, "Lítið til fugla himinsins. Hvorki sá þeir né uppskera né safna í hlöður og faðir yðar himneskur fæðir þá. Eruð þér ekki miklu fremri þeim?" -rétt eins og genginn suðafjárbóndi veit ég að hvorki gagnast aurar né dýr skítadreifari á meðal fugla himinsins.

 

Athugasemdir

[Húsari. (IP-tala skráð) 27.8.2022 kl. 03:10]

Sæll Magnús.

Þetta kvað hann Einar um Svölu sína:

Í snauðum heimi ég hlusta á löngum vökum
og heyri þyt af snöggum vængjatökum.
Minn engill hefur lyft sér ljóss í veldi,
þar líður aldrei dagur guðs að kveldi.
á meðan stundaglasið sandkorn á.

Megi sandkornið bera þig til sigurs!

[Magnús Sigurðsson, 27.8.2022 kl. 06:58]

Sæll Húsari, þakka þér fyrir ágætt ljóð Einars Ben, hann kunni að koma orðum að því sem máli skiptir. Líf og dauði er æðsta mikilvægi, enda samtvinnað.

Ef litið er til þeirra gilda sem medían heldur á lofti þá eru þessi sannindi sveipuð í móðu nú á tímum með því að gera mannsævina línulega, með áherslunni á að hafa komist yfir sem mest efnisleg gæði á endapunkti.

Það er sagt að á hebresku hafi upphafleg merking orðsins synd verið að missa marks, og sumir vilja meina að von geti allt eins verið fordyri helvítis.

Einar notar stundaglasið, sem líkingarmál, en það er þeirri náttúru gætt að þegar því er snúið þá verður aftur nógur sandur í glasinu og það spinnur sig áfram rétt eins og DNA spírall.

Líklega hefur eilífðin þannig með stundarglasið að gera. Við skyldum því ekki sóa lífi okkar á meðan stundarglasið sandkorn á og vera að fullu meðvituð um lífið og allt sem því fylgir.