Gálur á glapstigum

Það hefur sjálfsagt farið framhjá fáum að tvær af Davos dúkkulísunum smurðu kyssitauið í upphafi vikunnar og flissuðu sig síðan austur í Kænugarð til að gleðja jaxlinn sem fer með aðalhlutverk í einu spilltasta ríki veraldar.

Á meðan laumaðist Amerískur auðróni öllum að óvörum til að kaupa Skessuhorn á slikk. Sú sem flissar hvað best var reyndar búin að bjánast til að gefa í skin fyrir nokkru, að auðrónar eignuðust tæplega fleiri bújarðir á Íslandi.

Síðan hefur Héðinshöfði verið seldur til útflutnings vegna fádæma góðs kolefnisspors í steypu, og nú bújörðin Horn með skuði og skessu í öllu fæðuörygginu. Ameríkaninn ku víst ætla að reisa risa gistiskýli fyrir auðróna með súpueldhúsi. Spurningin er nú orðin sú hver best býður í Þingvelli.

Í Kænugarði skjölluðu þær stöllur leikarann ástsæla fyrir að verja lýðræðið og talað var um að bjarga honum bæði með vopn og aura, auk þess að endurreisa heilbrigðiskerfið og hefja orkuuppbyggingu á næsta ári, en þangað til flytja særðar lýðræðishetjur af vígvellinum á klakann til aðhlynningar.

Einhverjum kann kannski að finnast þetta full glannalegt hjá gálunum og tími sé komin til að tala við þær með hrútshornum. En sjálfsagt verður ekkert af svoleiðis skessuskap meðan snuðinu er reglulega stungið upp í landann og hann sefaður með loforðum um eina og eina kolefnisfría ferð til Tene.

Athugasemdir

[Jóhann Elíasson, 15.3.2023 kl. 14:57]

Þú ert óborganlegur Magnús......  

[Birgir Loftsson, 15.3.2023 kl. 15:52]

Sæll Magnús. Kannski er bara gott að stofnun íslensks hers hafi ekki átt sér stað. Þær væru líklegar til að senda greyin austur í stríð.

[Magnús Sigurðsson, 15.3.2023 kl. 18:31]

Takk fyrir félagar.

Jóhann þó svona gálur séu dýrt spaug þá vitum við hver fær að borga.

Birgir réttast er að taka Mogens Glistrup á íslenska herinn. Enda hafa flestir herir ekki verið til annars en hryðjuveka aflands og drápa á eigin borgurum.

[Ingólfur Sigurðsson, 16.3.2023 kl. 03:49]

Ég spyr mig: Hvar eru flokkarnir sem ættu að berjast fyrir sjálfstæði og að erlend yfirráð séu ekki of mikil á landinu? Hvar er unga fólkið sem ætti að vita að þetta er þeirra framtíð, ekki alþjóðleg spilling heldur að það sem hentar okkar aðstæðum?

Vinstri grænir spruttu uppúr Alþýðubandalaginu. Framganga Nató í þessum hildarleik og valdatafli finnst mér að hafa sannað að andstaða VG og fleiri flokka hér áður fyrr var ekki ástæðulaus.

En nú er því öllu varpað fyrir róða, og dansinn í kringum gullkálfinn aðalmálið! 

Svona fólk hugsar bara um eigin frama og völd, því miður. Þarf fólk að finna það út með rýrnandi lífskjörum, að aðeins Sigmundur Davíð og þannig stjórnmálamenn standa með fólkinu?

Guðjón skrifar um að fólk á Fésbókinni sé almennt lítt spennt fyrir þessu sjónarspili. Jafnvel stuðningsmenn Selenskís hér á landi á Fésbókinni munu ekki vera sannfærðir.

Síðan er það kostnaðurinn við heimsókn tindátanna í maí. Á meðan allar þjóðir á Vesturlöndum eru við kreppunnar dyr er þessu haldið áfram!

Vel orðaður pistill.

[Magnús Sigurðsson, 16.3.2023 kl. 05:55]

Blessaður Ingólfur, -og takk fyrir innihaldsríka athugasemd. Já hvar eru flokkarnir og hvar er fólkið?

Flokkarnir hafa flestir verið keyptir af Davos auðnum, ef þeir hafa þá ekki nóg afauðrónum á að skipa sjálfir.

Fólkið flýtur að feigðarósi, stein heldur kjafti úti á Tene, þó allt sé reynt til að klína kolefnisbremsufarinu í nærbuxurnar. 

Það kann aldrei góðri lukku að stýra þegar fólkið kaupir vitleysuna með þögninni, -kolefnisjafningi og carbfix, sættandi sig við snuðið. Þannig var það fyrir hið svokallaða hrun og þannig er það í dag.