Gervigreind - flokkað sorp

Það er búið að að fábjánavæða glóbalinn með trú á ritrýnda tölfræði – fengna úr spálíkönum – smart dýrkun og að flokka sorp ofan í sömu sömu holu.

Þegar sýndarveruleikinn og gervigreindin bætist svo ofaná allt saman – frá þeim sem hæðst gala, -er ekki von á góðu.

Þar sem lífsreynsla – skilningur og raunveruleg kunnátta í lífsins gildum eru látin sigla sinn sjó, -nálgumst við veruleika þar sem hver verður sjálfum sér næstur.

Það kann aldrei góðri lukku að stýra þegar fólk kaupir óskapnaðinn með þögninni, -kyngjandi honum með kolefnisjafningi og carbfix, -sættandi sig við snuðið.

Athugasemdir

[Húsari. (IP-tala skráð) 5.6.2023 kl. 12:04]

Sæll Magnús.

Þessi mikla umræða að undanförnu
um gervigreind er mest auglýsingaskrum
en dramadrottningar ætla að græða
grimmt á þessu öllu; - segja af sér
og allt eftir því til að auka á spennu
og eftirspurn.

Um áhrif þessa alls má segja líkt og Mark Twain
að breyttu breytanda: Frásagnir af óendanleika lífs míns
eru stórlega ýktar!

Bestu kveðjur í gula húsið við yzta haf!

[Magnús Sigurðsson, 5.6.2023 kl. 14:16]

Sæll Húsari, -já ég held að það sé mikið skrum í þessari gervigreindar umræðu og sjálfsagt verður gervigreindin líka notuð sem skálkaskjól.

Ég sá á bloggi í dag að gervigreindin væri nokkuð gáfuð, því hún væri að mestu með sömu niðurstöðu og Seðlabankinn og hagfræðingar um hvernig ætti að ráða niðurlögum verðbólgu.

Albert Einstein var ekki gervigreindur maður, en hann orðaði svona aðferðafræði eitthvað á þá leið að að gera það sama aftur og aftur og búast við mismunandi árangri væri bilun. En það er einmitt af þessari aðferðafræði sem gervigreindin tekur mið af, eða réttara sagt apar það upp sem glymur hæðst úr tunnu síbyljunnar.

Gervigreindina má einnig líkja við flokkað sorp, sem er til umræðu þessa dagana að lendi ekki á réttum stöðum  en það hefur lengi verið svo með sorpið að þar er allt unnið út frá vitlausum enda. Auðrónar hagvaxtarins vilja síauknar umbúðir.

Á meðan öskutunnurnar voru í gamla daga þá var sorpið brennt heima við hús enda fæstar neysluvörur í öðru en endurnýtanlegum umbúðum. Þá var hægt að kaupa mjólkina upp á lítir í eigin brúsa og kjöthakkið upp á gramm í smjörpappír svo ekki sé minnst á gosið í sömu flöskum á meðan þær voru óbrotnar.

Fólk einfaldlega keypti eins lítið af sorpi og möguleg var, annað en dagblöð enda mátti skeina sér á þeim. Nú er borgurum gert að flokka síaukið magn af sorpi í allt að fjórar tunnur og svo kemur ruslabíllinn og tæmir þær í sömu holu, eða það sem verra er að það er sent úr landi og brennt þar eftir allan flutninginn og umstangið.

Þú getur svo rétt ímyndað þér hvað gervigreindin segir um sorpið og kolefnisporið, það verður ekki gáfulegra en hvað verðbólguna varðar.

Eins og þú sérð á skætingnum þá er ég ennþá pikk fastur í steypunni en það styttist í gula húsið.

Með kveðju af Héraði.