Hús úr hassi

Þó undarlega kunni að virðast þá er farið að byggja hús úr hassi, eða kannski réttara sagt hampi, sem er jurt af þeirri ætt er gefur af sér kannabis. Hollenska fyrirtækið Dun Agro hefur um nokkurt skeið framleitt vörur úr hampi og hefur nú hafið framleiðslu húsa úr þessari jurt. Fyrirtækið hefur sérhæft sig í að steypa húseiningar úr hampi og telja sig geta afhent 500 hús á ári. Heimasíðuna má skoða hér.

Dun Agro er ekki fyrsta fyrirtækið sem hefur reynt að byggja hamphús. Hins vegar segjast þeir vera fyrstir til að takast það með einhverjum árangri. Þeir vilja meina að eitt af því jákvæðasta við þessi hús sé kolefnisporið. Hampurinn í hús taki til sín ca 13.500 kg af CO2 við það eitt að vaxa, hann er síðan uppskorinn og bundinn í steypu hússins ásamt kolefninu. Það þarf mikil vísindi til að umreikna rúmál ósýnilegrar loftegundar í sýnilegan massa með jákvæðu kolefnisspori í húsi úr hassi, gott ef ekki hugvísindi.

Hér sést í endan á steyptri hampveggs einingu frá Dun Agro 

En hversu raunhæft er notagildi hamps burtséð frá kolefnissporinu? Ef eitthvað er að marka Vísindavef Háskólans nær saga hampræktunar árþúsundir aftur í tímann. Samkvæmt kínverskri goðsögn færðu guðirnir mannkyninu eina plöntu að gjöf sem átti að uppfylla alla þarfir þess og var plantan sú formóðir allra kannabis- og hampplantna í heiminum.  Mikilvægi hamps og notagildi hans hefur ekki síst legið í því hversu trefjaríkir stofnar plöntunnar eru. Trefjarnar mátti nota í klæði, segl, reipi, pappír og margt fleira. Sem dæmi var hampur notaður bæði í segl og kaðla á tímum landafundanna miklu. Greinina um hamp á vísindavefnum má nálgast hér.

Hamp er hægt að rækta hér á landi, og þá á annan hátt en við raflýsingu til ólöglegra nota. Fyrstu skráðu heimildir um ræktun á hampi á Íslandi er að finna í bréfi sem Vísi Gísli sendi syni sínum árið 1670 þar sem hann segir frá tilraunum sínum með að rækta innfluttar plöntur. Fyrir rúmum áratug var gerð tilraun með ræktun á iðnaðarhampi úti í guðs grænni náttúrunni norður í Eyjafirði og gekk ræktunin vel. Um notkunar möguleika hampsins má einnig fræðast í BB hér.

Það hefur verið talið, þar til fyrir skemmstu, að sá sé í besta falli "steiktur hasshaus", sem hefði látið sér detta í hug að byggja hús úr hassi. En eftir að tilvist heimsins byggist orðið að mestu á hinu ímyndaða kolefnisspori og reiknikúnstum sem má líkja við gullgerðalist, þarf sá ekki að vera neitt "steiktur" sem lætur sér til hugar koma að byggja og selja hús úr hassi þó ekki væri nema kolefnissporsins vegna. Þó svo sporinn hræði þá virðist hampur veraverulega misskilin jurt.

Waking Times

Athugasemdir

[Valdimar Samúelsson, 16.1.2019 kl. 15:25]

Góð framför nú er bara að fá hey/gras viðurkennt sem byggingaefni og því vilja þeir ekki viðurkenna gras sem CO2 notenda. Allt pólitík.

Peru íbúar byggja flott hús úr heyi og mold en öllu er hrært saman og mótað sem einskonar hleðslu/kubbar. Þarna er góð einangrun og 

væri tilvalið fyrir gamalt hey og jafnvel upplagt efni í Bilskúra og fleiri þessháttar hús.

[Magnús Sigurðsson, 16.1.2019 kl. 17:28]

Það er framför að viðurkenna hampinn aftur sem nothæft efni. Honum virðist hafa verið rutt markvist úr vegi svona eitthvað í líkingu við glóðarperuna nýlega, þ.e.a.s. þegar hann var ekki lengur nógu "hagvaxinn" fyrir "hagvöxt" hinna réttu.

En ég er hræddur um að þetta kolefnisreiknidæmi lagi loftslagið lítið, enda með undurfurðulegri hugvísindaverkum. Kæmi ekki á óvart að svona reiknisdæmi væru álíka umhverfisvæn repjan sem átti að vera rétta skóstærðin fyrir kolefnissporið.

[Valdimar Samúelsson, 16.1.2019 kl. 22:38]

Magnús Einhver sagði fyrir nokkrum árum að hampurinn ræktanlegur á Íslandi og væri vel nothæfur til  að búa til metanól.

Spurningin er þá líka hvort Gras sé nothæft en yfir nokkrum árum þá vantaði rétta ensímið til að virkja það.

[Sæmundur G. Halldórsson , 26.1.2019 kl. 05:43]

Ef einhver á leið um sunnanvert Frakkland þá ætti hinn sami endilega að heimsækja hina fornfrægu hafnarborg Marseille. Eitt aðalbreiðstrætið þar sem við standa borgaraleg hús í stíl Haussmanns baróns heitir la Canebière. Nafnið er dregið að latnesk-gríska orðinu cannabis! Götunafnið er próvensölsk mynd orðsins sem á nútímafrönsku væri chanvre og á íslensku hampur. Skýringin er sú að í þessari mestu hafnarborg við Miðjarðarhafið sem Marseille var öldum saman var einn helsti atvinnuvegurinn kaðla- og seglagerð úr hampi. Því miður er miðborgin nú heldur niðurnídd og meiri líkur á að rekast þar á hasshausa en á kaðlagerðarmenn! https://en.wikipedia.org/wiki/Canebière

[Sæmundur G. Halldórsson , 26.1.2019 kl. 05:44]

"dregið AF" átti að standa hér!

[Magnús Sigurðsson, 26.1.2019 kl. 09:31]

Sæmundur takk fyrir þessa ábendingu.

Þetta sýnir vel hvað hamp plantan var mikils metin á öldum áður. Það bendir margt til að efnahagslegir stórlaxar okkar tíma hafi komið notagildi hennar fyrir kattarnef með lagaklækjum.

Til eru ótal sagnir um lækningarmátt plöntunnar, sagt er að boddý fyrstu Ford bílana hafi verið úr hampi og allir vita hvernig nælonið tók við af hampinum í köðlum og fatnaði.

Ef Kínverska goðsögnin er sönn, þ.e. að guðirnir hafi gefið mannkyninu þessa einu plöntu til uppfylla allar þarfir þess, þá er ekki að undra að efnahagsleg stórveldi á við stáliðnað, olíuvinnslu og lyfjagerð hafi þótt rétt að hindra aðgang manna að hampi.