Er Orkupakkinn Geysis-Glæsir genginn aftur?

Það er til er þjóðsaga sem segir frá draugnum Sandvíkur-Glæsi. Þessi draugur gekk ljósum logum austur á fjörðum, nánar tiltekið á svæðinu á milli Norðfjarðarflóa og Reyðarfjarðar. Hann var, eins og nafnið bendir til, kenndur við Sandvík.

Getgátur voru uppi um að Glæsir þessi ætti sér erlendan uppruna, væri sjórekinn kapteinn af erlendu skipi. Tvennum sögum fer af því hvort hann var bæði með lífsmarki og peningakistil þegar hann fannst. Kistillinn var talin mikilsvirði eftir að kapteinninn hafði geispað golunni og peningar voru einnig ástæða þess að draugurinn var uppvakinn. Glæsis nafnbótina fékk hann fyrir að vera uppá búinn með pípuhatt. Hann átti það til afturgenginn að taka ofan þegar hann mætti sveitavarginum á förnum vegi og fylgdi þá yfirleitt höfuðið hattinum.

Hvort Glæsir átti sök á því að landsvæðið þar sem hann gekk ljósum logum lagðist í auðn er ekki gott að segja. En ógæfunnar varð vart frá upphafi á næsta leiti við peningakistilinn og vissulega var Glæsir talin ein af ástæðum þess að ekki þótti þarna lengur búandi, þrátt fyrir búdrýgindi til lands og sjávar sem engin hafði efast um allt frá landnámi fram á 20. öld.

Nú til dags fara erlend glæsimenni með himinskautum og kaupa heilu sveitirnar fyrir klink í skottúrum á einkaþotum. Er þar skemmst að minnast Grímstaða-Glæsis, sem hefur auk þess keypt mest allan Vopnafjörð og hefur nú hafið fjárfestingar sínar á heiðum norðan Vatnajökuls sem helst hafa verið þekktar fyrir að vera sögusvið Bjarts, í Sumarhúsum sjálfstæðs fólks.

Grímsstaða-Glæsir er þekkur orkugrósser sem hefur auðgast gríðarlega á því sem kallað er „fracking“. Það er að sprengja jarðskorpuna með efnameðferð sem gerir grunnvatnið ódrykkjarhæft, en gefur af sér þeim mun verðmætara gas. Hvort sá Glæsir á eftir að fara þannig að ráði sínu á íslenskum öræfum er ósennilegt, ef eitthvað er að marka hans eigin orð.

Hann segist kaupa upp land til að vernda upptök vatnasvæðis villta laxins í Vopnafjarðaránum og hættir því væntanlega ekki landakaupum á Íslandi fyrr en hann verður kominn með fullt eignarhald á Vatnajökli. Grímstaða-Glæsir hóf reyndar svona landakaup í Skotlandi fyrir nokkrum árum án þess að átta sig á að þar var engin villtur lax lengur. Hefur hann frá þeirri uppgötvun átt í málaferlum vegna skerts nýtingaréttar síns á Skotlandi sem hann vill fá að breyta í Gasland.

Einnig er skemmst að minnast Magma draugagangsins sem upp vaktist skömmu eftir hið svokallaða hrun og hefur gengið ljósum logum norður á ströndum síðustu misserin undir nafninu HS orka. Engin virðist vita með vissu hverra manna Magma er en í alla staði er hann einstaklega byggða- og umhverfisvænn. Þeir Glæsir sem þar fara um byggðir er sennilega dugandi dreggjar þeirrar geispandi golu sem skottaðist til Tortóla eftir að Geysir Green Energy rauf skarð í eignarhald almennings á orkuauðlindum landsins, korteri fyrir hið svokallað hrun.

Nú stendur yfir draugagangur þjóðkjörinna fulltrúa á alþingi. Má allt eins segja að Geysis-Glæsir gangi þar aftur. Enda þeir mórar og skottur sem nú ríða röftum í húsum þjóðarinnar að mestu leiti sama hyskið og samanstóð af gamla landsliðinu í kúlu sem náði þeim einstaka árangri að kepp til heimsmeistaratignar í þjóðargjaldþroti.

Nú virðist það ætla að hafa sama háttinn á og Sandvíkur-Glæsir á árum áður, taka höfuðið ofan og hverfa svo með eldglæringum eftir að hafa platað inn á sveitavarginn neytendavernd ættaðri frá Brussel og koma á stofn sjálfu sér til sjálftöku þjóðarsjóð.  Allt kemur þetta til með að losa þjóðina við allt umstang og áhyggjur af orkuauðlindinni til langra frambúðar en hvort unga fólkið yfirgefur athafnasvæði Glæsis og skilur eftir draugabyggðir á svo eftir að koma í ljós.

Kúnstir að baki orkupakka

Athugasemdir

[Bjarni Gunnlaugur Bjarnason, 11.4.2019 kl. 16:39]

Dittó!

[Magnús Sigurðsson, 11.4.2019 kl. 17:33]

Það er af sem áður var þegar á kirkjustað sást til tveggja drauga sitjandi á kirkjugarðinum við sálarhliðið þar sem þeir héldust í hendur og kváðu:

Vögum, vögum, vögum vær

með vora byrði þunga,

af er nú sem áður var

í tíð Sturlunga

og í tíð Sturlunga.

Þessir kynnu trúlega betur við sig nú til dags.

[Ómar Geirsson, 11.4.2019 kl. 22:50]

Þú verður að fyrirgefa mér Magnús, en ég ætla að stela link af þessum pistli og bæta honum við nýjasta pistil minn.

Þar endaði ég á að spá í hvað veldur, og datt reyndar ekki í hug að Sandvíkur Glæsir gæti komið við sögu.

En hugurinn leitar allaf í útlandið, í lendur hins skítuga fjármagns.

Það er náttúrulega heilber heimóttarskapur og minnimáttarkennd, að ég skuli draga í efa vit innlendra fyrir öll þessi ólíkindi.

Pistill þinn gæti bætt eitthvað þar úr og fer í athugasemdarkerfi mitt, vonandi þér að meinlausu, en alla vega engu að síður.

Hafðu yndislega þökk fyrir góðan endir á erfiðum degi, það á enginn óbilaður að þurfa að lesa lögálit án borgunar, og það helst með miklu álagi.

Takk fyrir mig.

Kveðja úr neðra að austan samt.

[Magnús Sigurðsson, 12.4.2019 kl. 06:05]

Takk fyrir innlitið og athugasemdina Ómar. Alveg sjálfsagt að nota vangaveltur um þá Glæsi.

Hjartanlega sammála þér "það á enginn óbilaður að þurfa að lesa lögálit án borgunar" enda er mikið af lögum til  þess gerð að flækja um fyrir fólki hvað réttlætið varðar.

Hvað þá þegar á að hafa af fólki frumburðarréttinn, láta það borga fyrir það eitt að fæðast. Það er sagt að hjartað viti allt fyrst, þess vegna eru lagaflækjur sem er ætlað að fara í kringum réttlætið djöfullegar aflestrar.

Með kveðju að ofan.

[Valdimar Samúelsson, 12.4.2019 kl. 09:36]

Þakka mjög góða grein en er þetta ekki einmitt sannleikurinn. Hér stjórna heimsvaldasinnar , ESB sinnar ásamt landráðamönnum. 

[Símon Pétur frá Hákoti (IP-tala skráð) 12.4.2019 kl. 10:01]

Frábær pistill Magnús.  Og það er hárrétt sem þú segir í athugasemd, að hjartað viti allt fyrst, það er innsæið, hinn eini sanni kjarni vits okkar. 

Lagaflækjur eru hins vegar einmitt flækjur borgaðra manna, sem hafa það að atvinnu að fara á svig við réttlætið.  Fyrir þær flækjur er þeim borgað.

Lög manna eru ekki af guði snert, en hjarta okkar fær hins vegar líf sitt af guði, almættinu, og innst inni vita það allir.  Treystu áfram innsæi þínu og hyggjuviti.  Það er þúsund sinnum verðmætara en lögfræði reikulla manna sem þiggja 50.000 krónur fyrir klukkustundar uppdiktað álit og segja í því sitthvað svo sem bíði þeir þess hvort einhver bjóði þeim enn betur.  Af aurum verða þeir apakettir.

[Valdimar Samúelsson, 12.4.2019 kl. 10:51]

Magnús ég verð að taka undir það sem Simon Pétur segir þótt hann sé ekki frá Vatnskoti en þar var annar gáfaður Símon. Vatnskot sem ég á við er við Þingvallavatn.

[Magnús Sigurðsson, 12.4.2019 kl. 17:20]

Sælir Valdimar og Símon Pétur í Hákoti, og takk fyrir athugasemdirnar. Ég tek heilshugar undir þær með ykkur Valdimar, og af öllu hjarta undir vel orðað innlegg Símonar, jafnvel þó svo að hann sé ekki frá Vatnskoti.