Á að senda Alþingi í meðferð?

Við höldum úti sendiráðum um allan heim og 63 þingmönnum t.d. eru Svisslendingar með 30 þingmenn og færri sendiráð en við þó þeir telji 7 milljónir.   Skildi þessu "rústbjörgunarliði" á Alþingi aldrei detta í hug að líta sér nær og hugleiða augljósar staðreyndir.

 

Þarf að setja upp meðferðarstofnun að hætti SÁÁ til að gera Alþingi eftirfarandi ljóst?

Skuldsetning er veikleiki okkar.  Við þjáumst af andlegum flækjum og reynum að flýja þær með því að drekkja vandræðum okkar í lántökum.  Við reynum að ýta raunveruleika lífsins frá okkur með því að öðlast lánstraust.  En skuldsetningin fæðir ekki, klæðir ekki né hýsir; hún slær aðeins lán út á framtíðina og eyðileggur okkur að lokum.  Við reynum að kaffæra tilfinningar okkar til að flýja raunveruleikann án þess að gera okkur grein fyrir né hafa áhyggjur af því að áframhaldandi skuldsetning mun margfaldar vandamálin. 

 

Þessi texti er fengin að láni úr Tuttugu og fjögurra stunda bókinni sem er ætluð félögum í AA í þeirri lífstefnu að lifa einn dag í einu.  Smávægilegar breytingar hafa verið gerðar á textanum, þar sem orðið áfengi og drykkja  kom fyrir var orðunum skuldsetning, lán og lánstraust sett í staðinn.

 

Frumtextinn er svona;

Áfengi er veikleiki okkar.  Við þjáumst af andlegum flækjum og reynum að flýja þær með því að drekkja vandræðum okkar í áfengi.  Við reynum að ýta raunveruleika lífsins frá okkur með drykkju.  En áfengið fæðir ekki, klæðir ekki né hýsir; það slær aðeins lán út á framtíðina og eyðileggur okkur að lokum.  Við reynum að kaffæra tilfinningar okkar til að flýja raunverulegt líf án þess að gera okkur grein fyrir né hafa áhyggjur af því að áframhaldandi áfengisneysla margfaldar vandamálin.  Hef ég náð valdi yfir óstöðugum tilfinningum mínum?

950 milljarðar að láni

Myndlistarsýning.

 

Nú stendur yfir samsýning Myndlistarfélags Fljótsdalshéraðs. Sýningin var formlega opnuð í flugstöðinni á Egilsstöðum þann 17. júní s.l..  Félagið hefur reglulegar samsýningar félagsmanna sem hafa hin síðari ár verið haldnar í flugstöðinni.

Sýnendur eru; Anna Hjaltadóttir olía, Anna Þórhallsdóttir olía, Ásdís Jóhannsdóttir olía, Ásta Sigfúsdóttir gler, Boði Stefánsson olía, Eiríkur Sigfússon akríl, Elín Gísladóttir olía, Guðborg Jónsdóttir vatnslitir, Katarzyna Dedela olía, Kristín Rut Eyjólfsdóttir akríl, Magnús Sigursson stucco (múrverk), Oddbjörg Sigfúsdóttir olía, Ólöf Birna Blöndal olía, Sigurlaug Stefánsdóttir olía, Sigrún Steindórsdóttir olía,  Sölvi Aðalbjarnarson olía, Vilhjálmur Einarsson olía, Ævar Orri Dungal olía.

Í ávarpi Björns Krisleifssonar formanns félagsins við opnunina, koma m.a. fram; "Oft heyrist kvartað undan slæglegri mætingu á menningarviðburði.  Hér þurfum við ekki að örvænta.  Á síðustu sýningu okkar mættu 93.783 gestir, sem var farþegafjöldinn um flugstöðina meðan myndverkin voru til sýnis.  Eru þá ótaldir þeir, sem voru að koma með, eða sækja farþega.

Myndir frá sýningunni, smella má á mynd til að stækka hana.

     

Hvaða Möller er þetta?

Er þetta ekki sami Möllerinn og varði aðila í Baugsmálinu með oddi og eggi fyrir dómstólum?  Þar varð hagstæð niðurstaða fyrir einhverja aðra en þjóðina.  Eitt veit ég af reynslunni, þessi Möller er til sölu fyrir rétt verð.

Hagstæð ákvæði Icesave

Sumarsólstöðudraugar og bankasýslumenn ríkisins.

Við sem aldur höfum til og þjáumst ekki af gullfiskaminni, munum eftir Steingrími sem ráðherra Alþýðubandalagsins.  Satt best að segja hélt ég að Steingrímur yrði aldrei aftur ráðherra Íslendinga, eiginhagsmunagæsla hans sem ráðherra í síðustu ríkisstjórn Steingríms Hermannssonar myndi seint gleymast. 

En þó svo mikið vatn hafi runnið til sjávar og Alþýðubandalagið sáluga liðið undir lok síðan þetta var, þá hafa þeir Svavar Gestsson nú risið upp sem draugar um sumarsólstöður, íslenskri þjóð til stórtjóns.  

Skattahækkanir bera allar að sama brunni, magna upp verðbólguna til að bæta eiginfjárstöðu gjaldþrota bankakerfis á kostnað heimilanna í landinu.  Niðurskurði almannatryggingakerfisins er ráðstafað daginn eftir til að setja á stofn Bankasýslu ríkisins.

Stofna Bankasýslu ríkisins

Þetta eru asnar Guðjón.

Það kemur varla annað upp í hugann þessa dagana en heitið á söguni hans Einars Kárasonar "Þetta eru asnar Guðjón" eða þá "helvítis fokking fokk". 

Hvað með hina heilögu kýr vertrygginguna?  Skyldi þessum blessuðu varðhundum fjármagnsins aldrei detta til hugar að nú sé nóg komið og setja vísitölunni skorður.

Það er ekki hægt annað en að vera sammála því að skatttekjur verði auknar af óhollustu, en það er sorglegt að sjá hvernig vísitalan er stöðugt notuð til að auka skuldir almennings. 

Það er svo varla von að það heyrist mikið frá Gylfa og Villa og félögum.  Þeir fagna væntanlega bættum hag lífeyrissjóðanna í laumi.  Meðan verðbólgunni er viðhaldið með öllum ráðum.  Allavega rétt á meðan verið er að fela mest ósómann  og koma honum yfir á ábyrgð skattgreiðenda í formi einkaframkvæmda til atvinnuuppbyggingar.

 

Skattur á kex og gos í 24,5%

Síðasti þjóðhátíðardagur frálsra Íslendinga?

Verður þetta í síðasta sinn sem Íslendingar halda upp á 17. júní sem frjáls þjóð? Gerir samþykki Alþingis á icesave það að verkum að íslendingar verða skuldaþrælar um ókomna tíð?  Felst lausn þjóðarinnar í því að ganga í ESB með þessa skuldaklafa á herðunum?

 

Gátu ekki stöðvað Icesave

Hvað ef það væri þorskastríð?

Spurningin er hvort Alþingismenn samþykkja samning sem þeir hafa aldrei séð.  Samning sem mun gera Íslensku þjóðina tæknilega gjaldþrota um leið og hann verður undirritaður.  Satt best að segja væri þeim trúandi til þess.

Vextirnir einir af þessum samningi munu éta upp allan vöruskiptajöfnuð landsins og gott betur, það þó aðeins sé miðað við bestu ár hingað til, slíkir eru afarkostirnir.  Það þarf huglausa stjórnmálamenn til að samþykkja slíkan gjörning.  Því miður virðist vera nóg framboð af stjórnmálamönnum sem geta ekki með nokkru móti tekið á málum í sátt við þjóðina. 

Enn leynd yfir Icesave-samningi

Steingeld ríkisstjórn.

Það var svo sem ekki von á góðu þegar ríkisstjórnin boðaði skatthækkanir, en frestun niðurskurðar.  Stórhækkun á tryggingagjaldi er tvíbent, þar er um skattahækkun að ræða sem leggst hlutfallslega á allar launatekjur sama hvort þær eru háar eða lágar.  Atvinnurekendur verða nú að skera af sér allan launakostnað sem þeir mögulega geta verið án.  Þá bætist við atvinnuleysið.

Fjármagnstekjuskatturinn skilar væntanlega litlu í framtíðinni frá öðru en sparnaði eldri borgara og þeim sem af einhverjum ástæðum hafa hliðar tekjur s.s. leigutekjur af húsnæði.  Sá skattur gerir þeim væntanlega enn erfiðara fyrir sem verst eru staddir með húsnæði, s.s. óselda aðra eign.

Hvenær þessi ríkisstjórn tekur á  því sem raunverulega skiptir máli bólar ekkert á.  Ríkisbankarnir malla þrír áfram gjaldþrota með yfirbyggingu langt umfram þörf og getu, skilanefndir gömlu bankanna mala gull og ríkisbákn elítunnar stendur óhaggað eins og nátttröll liðins tíma.

Skattahækkanir úr ríkisstjórn

Lauþegar ættu að gera Sigurð G Guðjónsson að foringja sínum.

Sigurður hefur fundið leið til að bæta kjör, ekki einungis Sigurjóns Árnasonar, heldur alls almenns launafólks.  Nú ætti hann að aðstoða launafólk í því að stofna séreignasjóði um lífeyrissparnað sinn þar sem fólk getur tekið hann út með vaxtalausu láni til sjálfs sín og með einum gjaldaga, sem mætti þess vegna vera eftir dauðadag sjóðseigendans.  Því samkvæmt aðferðafræði Sigurðar yrðu lánþegar einungis að komast að samkomulagi við sjálfa sig um gjalddaga og kjör.

Síðan mætti gera það að framtíðar markmiði að lögfesta bindiskylduna við ca. 8% svipað og hjá öðrum fjármálafyrirtækum og gætu þá sjóðfélagar lánað sér allt að nífalda þá upphæð sem þeir leggja til hliðar með viðbótarsparnaði.  Það þarf ekki að taka það fram að þarna yrði ekki um neinar skattagreiðslur að ræða fyrr en hinn eiginlegi lífeyrissparnaður verður útleystur sem gæti allt eins verið eftir dauðadag.  En það er allt undir því samkomulagi komið sem lánþegin gerir við sjálfan sig.

Hér gætu því verið um mun meiri kjarabætur að ræða en aðilar vinnumarkaðarins og ríkisstjórnin eru að díla um í sínum stöðuleikasáttmála.

Líkir láni bankastjóra við almenn lífeyrissjóðslán

Stöðvarfjörður.

 

Stöðvarfjörður er sennilega einn af þeim stöðum sem margir Íslendingar eiga eftir að uppgötva.  Það vita það sennilega fáir að á Stöðvarfirði er eitt stærsta steinasafn í heiminum í einkaeigu.  Safnið er heimsótt af 20 - 30 þúsund ferðamönnum árlega og eru erlendir ferðamenn þar í meirihluta.  Það var Stöðfirðingurinn  Petra Sveinsdótti sem hefur varði ævinni í að safna steinum sem á heiðurinn að þessu safni.  Í safninu, sem er á heimili Petru er merkilegri ævi hennar gerð skil auk þess sem risastór garðurinn sem nær langt uppfyrir húsið er með fegurri lystigörðum.  Það eru afkomendur Petru sem sem sjá um safnið.

Í nágrenni Stöðvarfjarðar eru margir áhugaverðir staðir s.s. Hafnarnes sem er eyðibyggð sem taldi á annað hundrað íbúa þegar best lét á fyrrihluta 20. aldar.  Þar má skoða margar rústir auk Franska spítalans sem áður stóð á Fáskrúðsfirði.  Eins er Kambanes, sem er við mynni Stöðvarfjarðar að sunnanverðu, áhugavert til gönguferða vegna einstaklegra fagurrar náttúru.  Lönd og Saxa sem eru við austanverðan fjörðinn eru ekki síður áhugaverðir staðir.

Síðustu þrjú árin hefur Stöðvarfjörður skipað stórann sess í mínu lífi.  Vorið 2006 keyptum við félagi minn húsið Sólhól á Stöðvarfirði til að gera úr því orlofshús og hófum á því endurbætur sem lauk vorið 2008.  Síðan þá höfum boðið húsið til útleigu fyrir ferðamenn.  Kennarasamband Íslands var með það til leigu í 8 vikur sumarið 2008 og hefur það í 10 vikur þetta sumar.  Þar fyrir utan hafa margir innlendir og erlendir ferðamenn nýtt sér það til dvalar í annan tíma. 

 

Auk þess að festa kaup á Sólhól, keyptum við aflagt fiskvinnsluhús (Salthúsið) vorið 2007 sem við höfum leigt sem geymsluhúsnæði á vetrum fyrir hjólhýsi, húsbíla fellihýsi o.þ.h..  Núna hefur það í fyrsta skipti hlutverk, síðan þar var fiskvinnsla, yfir sumartímann.  Þar er nú handverksmarkaður, ljósmyndasýning frá fiskvinnslu á Stöðvarfirði auk þess sem þar er varpað á veggi videoi frá veiðum og vinnslu.  Einnig stendur til að glæða húsið enn frekara lífi með hinum ýmsu uppákomum í sumar.  Salthúsið og markaðurinn er opin á mill 10:00 - 16:00 alla daga til 23. ágúst.

Það er því orðið mér talsvert kappsmál að kynna Stöðvarfjörð.  Þó að ég hafi búið í nágrenni Stöðvarfjarðar mest allt mitt líf , þ.e. á Egilsstöðum og Djúpavogi, og vitað af töfrum hans kom það mér skemmtilega á óvart hvað hann hefur upp á mikið meira að bjóða en ég hafði þegar uppgötvað.  Ég vil því skora á þá sem leið eiga um Austurland að gera Stöðvarfirði góð skil, þeim tíma sem í það er varið er upplifunarinnar ríkulega virði.

http://www.solholl.com/

Hérna á síðunni má einnig finna myndaalbúmið Stöðvarfjörður.